資金轉戰落後細價股，保險股當中，揀落後，炒民安（1389）。民安呢期積極拓展祖國業務，估計到今年底，集團喺內地省級分公司，將會增加到18家，支公司亦會由家陣31家，倍升到60家，ChinaPlay成份重好多。
同民安一樣，主打非壽險產品有財險（2328）。財險由10月到家陣升咗幾乎兩倍，P/B講緊1.8倍，民安最新P/B都係講緊0.7倍水位。又民安6月底止，唔計法定存款，手頭淨現金都講緊有13.7億銀，每股淨現金0.47元，係現價（0.86元）54%。喺金融海嘯非常期，有合適機會，集團有大把銀彈去執平貨，又有進可攻、退可守優勢。
再講，民安大股東中國保險，第二大股東長實（001）李超人，股東實力背景超雄厚之餘，兩大股東揸住民安嘅股權，又上到近69%，街貨唔係認真多。呢轉買民安，係咁意博佢上番1倍P/B，現價回報率講緊46%，價見1.26元。

渝港可炒同氣連枝

中渝置地（1224）對上星期升超過50%，同系渝港（613）只係升得12%咁大把，渝港已經有炒同氣連枝兼落後因素。又渝港揸咗中渝2.54億股（11.7%），單係計中渝上星期升幅，已經為渝港每股增值3.3仙，渝港現價都係講緊6.3仙。再講，渝港手頭淨現金1.2億銀，係現金牛之餘，最新NAV0.33元，現價折讓高達80%，折讓又係吸引到爆。買渝港，博NAV折讓係咁意上番70%，係講緊要翻半番到9.9仙。
錢雋