《ESPN》報道，曼聯中場保羅普巴會喺今夏離隊，即使紅魔無意賣佢，普巴亦會逼曼聯放佢走。

消息人士指，隨曼聯緣盡下季歐聯，加埋球隊新季肯定會大執位，令普巴渴望尋求新挑戰，有指佢嘅經理人拉奧拿喺完季後，就會即刻同曼聯講數。報道又指，曼聯嘅公開立場係視普巴為非賣品，但球隊內部將佢嘅轉會費定喺1.6億歐元（約14億港紙）。皇家馬德里係普巴唯一希望加盟嘅球隊，據指皇馬希望可以用大約1.2億歐元嘅轉會費買走普巴。

另外據英國《每日郵報》報道，曼聯領隊蘇斯克查希望喺今夏用8,500萬鎊（約8.5億港紙），收購祖雲達達斯前鋒保羅戴巴拿，而戴巴拿被祖記批准放假後，一直都喺英國度假，外界盛傳佢為轉戰英超，特登嚟睇樓。