【新增圖片】
日本組合AKB48今日舉行「第9屆AKB人氣總選」，因沖繩暴雨連場，今日更有強風及雷暴警告，導致原定於當地豐崎海濱公園沙灘嘅戶外場地都要臨時改到室內進行，目前已定在豐見城市立中央公民館舉辦，由於場地容納人數有限，所以唔會招待粉絲入場，大會就於海濱公園沙灘場地嘅帳篷內招待約數百名已到當地嘅fans睇直播，富士電視台都照原定計劃現場直播。

「AKB人氣總選」首次移師沖繩就搞到大鑊泡，大會已賣出下午演唱會及晚上總選嘅二萬張門票，而購買門票嘅粉絲現可進行退票服務，估計損失1.7億日圓（約1190萬港元）；同時，JTB旅行社亦售出2.6萬日圓至9.78萬日圓之旅行套票，至今已有1160客人幫襯，但隨住戶外騷取消，JTB都表示會全數退回受影響人士，當地酒店房間於昨日起已收到大批取消通知，令本來有數千萬日圓嘅經濟效益都打唔響，估計大減達一半嘅經濟收益。