因為合作劇集《逆緣》，而成為好友嘅「爺爺」陳家樂同林夏薇，噚日（24日）喺小欖燒烤場搞咗個BBQ gathering，同fans們以及劇組台前幕後工作人員聚一聚，現場約近200人，無懼33度高溫。

兩位主角到場後，就同班fans玩遊戲，大家玩到咿嘩鬼叫，好鬼開心。除咗同fans玩遊戲，參加過新秀歌唱比賽嘅陳家樂，就仲帶埋結他同林夏薇自彈自唱。

唱歌前，林夏薇分享咗佢哋前一晚夾歌嘅趣事，「由於大家都忙，約唔到出嚟綵排，我哋係用視像電話夾，佢話不如我彈你就唱啦，數三二一，佢就話：『你慢咗入啦。』我話冇理由吖，呢首歌我都算幾熟，跟住佢話再嚟過，又數四三二一，佢話：『你又慢咗。』我話有冇搞錯呀，點會慢咗呀，我話：『不如你同我一齊同時唱啦。』四三二一，我聽到嘅係同佢係同時唱，但係佢聽到我又係慢咗一拍，原來佢個電話係delay㗎！哈哈！」家樂都話︰「原來電話係夾唔到歌㗎，會有delay。」

然後陳家樂彈結他，林夏薇唱出《小幸運》，之後就輪到陳家樂solo謝霆鋒嘅《別來無恙》，佢已經有兩、三年冇拎住結他公開唱歌，佢話︰「嗰陣時一直都有練，但呢兩、三年都冇練，所以今次都有啲緊張。」

另外，當日fans仲送上蛋糕，為今個月30號生日嘅林夏薇慶祝生日，仲全場大合唱生日歌㖭。林夏薇喺社交網上載咗條切蛋糕許願時嘅片，片中大家唱完生日歌後，林夏薇許願時，陳家樂用「爺爺」腔話︰「Aki三年抱兩，你一個BB就一億。」許完願嘅林夏薇聽到呢句笑笑口，佢之後話︰「我希望大家記得我哋 逆緣呢部劇，到年尾都要支持我哋逆緣，同埋支持所有工作人員同演員，多謝大家！」

精選娛聞，喺晒《娛果》
http://fb.com/appledailyent