蓮姐問在場警員，知唔知道呢個車牌有乜特別，點知幾個警員都擰晒頭，蓮姐話番畀佢哋知：係八九六四呀！眾人先如夢初醒如當頭棒喝。蓮姐唔理得咁多，情商同行戰友幫佢影番張相留念，「可能曾蔭權都估唔到，有架警車毋忘八九六四」。
講開八九六四車牌，嚟緊星期日7月11號，運輸署會拍賣一個無字頭8964車牌，行內人估計呢個政治性車牌底價要十幾萬元，成交價隨時要20萬元，亦有人指因為政治敏感，未必太值錢。車牌花落誰家暫時不得而知，有支聯會常委稱，雖然冇正式討論過應否舉手競投呢個車牌，但由於支聯會冇車，就算買到呢個咁有意思嘅車牌返嚟亦得物無所用，所以傾向唔出手。
無字頭8964車牌由乜嘢人勾出嚟拍賣？至今仍然係一個謎，有人笑言，不妨由社民連主席陶君行出手買入，再轉送支聯會，以平息近日佢同支聯會、華叔互罵風波。華叔寫咗篇題為《陶君行可恥！》嘅文喺《明報》刊登，火氣甚猛，更表示對陶君行「睇住你大，睇住你壞」。