楊千嬅同老公丁子高今晚接受《今日ENT》直播訪問，同大家分享下早前為動畫電影《超人特工隊2》配音嘅趣事，接受下「記憶力大考驗」挑戰，考驗下佢哋對《超人特工隊》嘅認識，仲有「模仿大賽」，抽出生活中情景，再模仿對方去講出應對方法，最後更互相對方在自己心目中最英雄的一件事，當丁生講出後，身旁千嬅即時感動起來。

以真實夫妻身份去為動畫電影中的夫妻角色配音，楊千嬅與丁子高都非常興奮，尤其是演未試過的超人角色。當初獲邀參與配音前，兩人都需要接受面試，千嬅說：「我之前有其他配音電影資料，所以暗地過五關。」丁生笑說：「佢好順利直升大學，我就小學都未畢業，要由小學階段重新再考過，首先我把聲佢哋做咗一輪試音，第一次未係最滿意，因為阿Bob聲線比較雄壯，所以我o個次去試未係佢哋最理想，試咗第二次就滿意ok，我捉摸到把聲音係點。」

跟戲中角色最相似地方是甚麼？千嬅覺得聲演媽媽角色都近似自己，她說：「一個有小朋友，點平衡同先生相處，又想出去做嘢，然後點平衡屋企，好多時啲對白自己都講過，好似當中有一句，《個仔又撞親個頭，點解又會咁，我即刻返嚟》，好緊張嗰啲，好多媽媽都會講過。」由於近似自己，千嬅指今次投入速度是比較快。

丁生同樣覺得自己似阿Bob，佢話：「尤其我o依家做咗爸爸，我性格鍾意做主導同埋比較鍾意Control，在工作上係咁，家庭上又係咁，我喺度諗好似阿Bob調番轉喺第二集，突然間由前線去咗家庭會點，因為我做嘢又要做到最好，如果我返去打理家庭日常所有嘢，我都好似佢性格要做到最好，跟住就會失眠呀，唔開心呀，最後都同太太攞番平衡。」丁生覺得呢套電影喺現實生活中帶出正面諗法，因為好多家庭都會發生過。

分享對電影角色感覺後，兩人就接受第一個遊戲《記憶力大考驗》：
Q1 第一集《超人特工隊》距離依家幾多年？
丁生：14年
Q2 除咗主角一家仲有邊啲超人？
丁生：冰條俠
Q3 BB Jack Jack有咩超能力？
千嬅：雷射眼
丁生：變怪獸
Q4 根據E夫人所講，超人衫唔應該有咩？
丁生： 斗蓬
Q5 《超人特工隊》2005年獲得咩獎項？
千嬅：最佳動畫
丁生：奧斯卡

結果好明顯由丁生勝出，千嬅嘅小懲罰係分享一件配音小趣事，千嬅說：「有一幕講太太喺洗手間一路啷口，一路講嘢，因為我要似，要含住啖水講嘢，率之唔係一次就中，一講就噴晒出嚟，最後成半支水飲晒先講到嗰句說話，呢個比我好得意嘅經驗，個像真度要用聲去演係另一個層次。」

講到今次套戲主要講男主內、女主外，現實生活中夫妻兩人又點分配？丁生指他們夫妻兩人都好清楚對方工作時間表，例如他知道千嬅邊段時間工作，便會盡量那些時間不接工作，丁生說：「o依家Torres都大個，好多時一至五都三點後先放學返嚟。」千嬅指現時工作模式是自由身，只會想做的工作才會去做，令自己時間能夠彈性好多，她說：「我發覺做咗媽媽，一定係以屋企行先，如果唔係結婚做乜，好似以前咁係冇意思，一定係我好想有家庭，然後去照顧個家庭先，我先選擇有下一代，工作上係畀自己仍然有個夢想空間去追求，當好清晰排行位置，就會做到。」

談到湊仔仔趣事及技巧，千嬅指Torres是比較成熟，平日跟他溝通要以大人說話方式去傾，同時又經常要鬥智鬥力，亦要跟他鬥耐心，但幸好Torres是受教的孩子，而教導方式是不可用鬧及打，反而要用耐性去說服他，只要他信服後便可以下一秒配合你。為了Torres，夫妻兩人都有改變習慣，最明顥改變是食飯時看電話，千嬅說：「有時自己都要睇電話收Message，但又要話佢食飯時唔好睇ipad，所以自已咪要做，有時佢（丈夫）又唔得因為做梗嘢，有時人哋send嘢畀佢，佢又會話Torres唔好睇ipad，食飯唔好睇電視、睇ipad，專心啲知唔知道，跟住自己走咗去，個仔又好勁，唔會當場話佢，又唔出聲，不經意咁望一望，然後繼續食飯。」

「咁好啦，第二日daddy唔喺度，我同佢出去食lunch，我同佢講Torres唔好玩電話，唔好攪我個電話，佢就話噚晚daddy都睇啦，跟住我話daddy要睇因為有事，因為要做嘢，咁（Torres）話我都要做嘢，我睇圖書，即刻作啲理由，好強。」從而令佢哋明白Torres會平日儲埋好多東西，到有需要時候拎出來對質，所以佢哋更清楚身教的重要性。千嬅觀察到Torres成長比自己想像中快，續說：「我平時講嘢有時會跳制，用字都唔簡單，佢聽埋聽埋原來會學嘅，咁我就發現呢件事，有次佢話『媽咪我依家有法術』，咁你有法術可以做乜？『我覺得你個人好直，乜都要咁咁咁，如果你即刻變青蛙就好啦』，又會覺得佢好得意，但又激激哋氣，變你做青蛙因為你嘈。」

到《夫婦大考驗》，千嬅覺得喺阿仔心目中daddy最話得事，因為daddy一講唔準就可以停，丁生指事由有次講咗三次唔得，Torres仍然唔肯聽話，佢便將Torres一半玩具扮掟進埋圾桶，自始令Torres明白要承受番自己做過的事嘅後果。另外仔仔講嘅第一句說話，丁生就記得是叫「媽媽」。

到最後遊戲環節《模仿大賽》千嬅先抽到「Torres要求養寵物」，千嬅便扮丁生語氣講「Torres如果你要養狗係ok，不過你自己以後要照顧佢所有生活，餵佢食飯、清潔，同埋負責教佢所有嘢，唔好周圍popo。」假如Torres指好難，想daddy幫手，千嬅又繼續聲演：「你搞唔掂就唔可以養，媽咪可以幫手，姐姐可以幫手，但你要自己做先。」

輪到丁生抽到「Torres放學回家悶悶不樂」，丁生準備聲演前已經不停笑，當佢講咗第一句說話時，已經忍不住笑話：「點知我變咗E夫人。」千嬅話：「我無咁核突。」更笑指丁生似鬼上身多過似聲演自己。

千嬅再抽到「Torres打爛相架，爆喊。」千嬅再扮丁生話「Torres過嚟先，做乜喊，然後就帶入房傾。」丁生都認同千嬅答案，但首先都會睇下小朋友有冇受傷先，因為自己都會擔心。丁生指Torres甚少喊，佢記得有次一大班人食飯，佢叫Torres唔好玩ipad，然後收起部機，但換來Torres怒目對待，令丁生明白用此方法係行唔通，雖然用長氣去講道理先得。

到直播訪問尾聲，兩人被問到對方在心目中做過最英雄一件事？丁生說：「上次拍真人騷，佢被隻牛撞親，好跨張，撞親唔係英雄，我覺得佢係唔需要再拍落去，但我諗因為我係一個參加比賽就要做到最後嘅人，我話唔好玩不如算，佢突然企番起身話『冇事，我老公話要參加，繼續去』，嗰下覺得佢好man，佢好犀利。」在旁聽到老公讚美的千嬅感動起來，佢指當時諗明明有機會勝出，點解要被影響退出。

到千嬅講出丁生的英雄事，千嬅二話不說講「我覺得佢娶我嗰日就係英雄。」丁生即哈哈大笑起來，千嬅自嘲因為自己咁難頂，辛苦晒對方。
攝影：陳俊強