𠵱家雖然仍然係季初，但係本報波經嘅名家個個已經狀態大勇，喺周中連中兩日上下盤推介，重係波膽都中埋嗰隻，中完曼聯大勝五比○之後，又中布力般和利物浦二比二，而喺前日更加連有四十幾倍嘅三串四都中埋，都咪話唔巴閉。
不過話時話，本報可以中過關三串四（森林贏串布力般和波，再串愛華頓打和伯明翰），就真係要多得伯明翰唔夠運，因為佢哋一直都領先一比○，到補時階段先至俾下半場踢少件嘅愛華頓符碌迫和。當時愛華頓嘅安斯禾夫射波，個波中柱彈出省中伯明翰後衞根寧咸彈入，一比一。賽後伯明翰領隊布魯士就話呢個係殘忍嘅教訓，不過我哋《蘋果波經》就多得呢球先至全中！

限期將至英超球會亂買人
英超今屆增設八月三十一日嘅轉會限期，如果球會唔喺今個月三十一號前買人，就要等四個月。可能因限期臨近，轉會消息滿天飛，有球會重有亂買人之嫌；好似維拉買朗尼莊臣同保頓買岩士唐咁，似乎唔係咁啱用。不過相信球迷最關注嘅，始終係富豪球會曼聯幾時出手，同埋阿仙奴嘅新二號龍門係邊個。

洛辛堡唔夠班踢歐冠盃
前幾日阿仙奴領隊雲格講過，現時歐冠盃代表性唔夠，因為唔單止係冠軍隊先參加得，重呼籲改制。我求大俠好同意雲格嘅觀點，我甚至覺得就算係冠軍球隊，都要係歐洲頂級聯賽嘅先可參賽。好似挪威冠軍洛辛堡咁，佢哋喺外圍賽擊敗邦比後歷史性連續第八年參賽，不過佢哋有幾多實力大家心中有數喇，入到首圈又如何呢？