北京奧運昨日開幕，成為全球焦點。美股隔晚急挫224點，不少散戶都已預咗港股難逃一跌，然而昨日觸發港股急瀉的卻是內地股市。受深滬股市急挫拖累，港股昨午一開，期指已跳空低開超過200點，恒指最後收21885，跌218點；H指則跌201點，收報11742，跑輸大市。港股走勢已轉壞，料後市將向下回補7月中介乎21334至21672之上升裂口，21000關口將再受考驗。

「染藍」落空沽壓大

早前炒「染藍」憧憬而高見21.30元的中國遠洋（1919），近期可謂走晒樣，昨日再插10%，連08年低位14.40元都「隊」穿，跌至13.66元後才略見反彈上14元邊收市，一個月未夠股價已蒸發34%。收市後，恒指服務公司宣佈藍籌股組合無變，中遠近期之連環急插，莫非又係大戶晨早已收到風？
其實上市公司並不會因「染藍」而令生意做多咗，但因股份獲納入指數組合，多少總會惹來基金買盤，完全否定炒「染藍」概念亦講唔去。是次中遠股價大瀉，可能係市場共識經濟放緩將嚴重打擊航運業，以目前中遠形勢觀察，後市或要跌至12元水平才能喘定，現價無謂撈底。