爆相爆片丨陳曉華翻撻狄以達掃家品斷正 Ian疑似被派帽
蘋果日報 2020/12/19 00:30
陳曉華狄以達IanＭirror綠帽
「爛口港姐」陳曉華日前被指搭上炙手可熱的MIRROR成員陳卓賢（Ian），二人更計劃在荃灣築愛巢同居，又同車去深水埗買外賣。Ian fans明顯不希望偶像搭上TVB姐仔，嫌陳曉華係「長頸鹿」，又懷疑TVB用美人計引Ian過檔。報道出街後，Ian經理人花姐斬釘截鐵指車中人並非Ian，而陳曉華亦回覆傳媒澄清大家認錯人，堅稱自己仍是單身。當初fans以為Ian撻着女方，鬧爆他揀女友冇品味，誰知偶像原來躺着中槍，fans戥Ian唔抵之餘，怕且亦可以鬆口氣。
其實陳曉華3年前還未參選港姐時，被《蘋果》讀者踢爆和狄以達拍拖，但女方當選港姐後，即宣佈二人已分手，其間一直有指二人藕斷絲連，早前《蘋果》讀者陳小姐透過「爆相爆片」，目睹二人拍拖到九龍灣買家品。
早前晚上約9時許，讀者陳小姐在九龍灣MegaBox商場撞到兩人斷正拍拖，陳小姐接受電話訪問表示：「見到佢哋攞泊車飛，陳曉華身型咁高，冇戴帽好易認，男嘅雖然戴咗帽同口罩，但都認到係狄以達，因為佢哋企正我對面。佢哋攞完飛之後行去停車場，冇拖手冇親熱表現，但嚟得呢個商場，通常都係買家品，不過狄以達有啲避忌，似乎唔想俾人認到。」從讀者提供相片所見，當日陳曉華所穿的衫褲和斜孭袋，都在她的IG搵到，證明的確是陳曉華。至於狄以達當日所穿的的螢光珠片閃爆背心，亦在其IG不同場合中見到，可見他極為鍾情舞台誇張造型。
不過問題嚟嘞，傳媒指當日陳曉華和被指是Ian的男子，所坐的MINI Cooper座駕，是由Ian數月前成立的公司持有。咁究竟當日揸車載陳曉華的男士係邊個？陳曉華係咪借「新歡」Ian嘅車，畀翻撻嘅狄以達揸？謎團一個接一個，箇中內情耐人尋味，相信只有當事人先最清楚。
陳曉華身邊的另一半仍然是個謎，她之前更被傳愛黐何廣沛，明撬朱晨麗牆腳，有工作人員爆料，指有次拍外景，何廣沛陪陳曉華去廁所，但兩人去了很久都未返回場地；又有指陳曉華趁朱朱不在港，曾主動出擊約何廣沛食飯，直至朱朱返港，兩人才冇下文。現時陳曉華感情有着落，不知之前跟何廣沛的緋聞是煙幕，還是被何廣沛拒愛後，迅速搵到人接手呢？
《蘋果》昨日就翻撻一事聯絡狄以達，但狄以達WhatsApp已讀不回，電話亦一直未有接聽。
陳曉華日前被讀者撞破秘密翻撻舊愛狄以達。（讀者提供）
兩人在九龍灣行家品店，達仔的跳舞學校就位於九龍灣。（讀者提供）
在狄以達的IG中，所穿的螢光閃令令背心，正是他當日被《蘋果》讀者撞破和陳曉華拍拖所穿的同一件衫。（IG圖片）
在狄以達IG中，經常見到他穿上這件舞台感十足的背心到不同場合。（IG圖片）
Ian被指和陳曉華秘密拍拖，更同車買外買，不過Ian經理人花姐就澄清車中人並非Ian。（IG圖片）
陳曉華被身高出賣，讀者一眼認出她。（IG圖片）
陳曉華IG有同一個粉紅色斜孭袋。（IG圖片）
陳曉華被爆趁朱朱不在港，主動出擊約何廣沛食飯。（網上圖片）（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！