韓國型男玄彬夥拍女星朴信惠合作嘅tvN新劇《阿爾罕布拉宮的回憶》噚晚播出第9集，收視比上周微跌至7.563%，不過仍穩佔同時段所有收費台嘅收視冠軍。

噚晚一集主要集中玄彬為咗尋找失蹤嘅燦烈，於是不眠不休去苦練「AR擴增實境」遊戲，更一口氣升級至level 90，仲發現燦烈同自己一樣，因為喺遊戲中殺了好友，而喺遊戲中不斷被好友追殺，而玄彬得到「管理者訊息」嘅提示後，知道必須返回西班牙先可以破解呢個訊息，於是玄彬又同秘書齊齊返回西班牙。

玄彬同秘書喺火車站等候之際，突然遊戲中嘅一班神秘人出現，原本已升級至level 50嘅秘書想去協助玄彬，點知秘書亦自身難保，被遊戲內嘅角色追殺，而此時玄彬嘅遊戲螢光幕更出現「你失去了同盟」字眼，玄彬打電話畀秘書，但卻冇人接聽，令玄彬懷疑秘書喺現實世界中同樣已死亡。今晚一集預告中，失蹤多時嘅燦烈終於現身朴信惠面前，令人期待到底燦烈點樣擺脫被追殺。

另外，《阿爾罕布拉宮的回憶》將於下月20號播畢，而劇集已完成所有拍攝，今日劇組更舉行煞科宴，玄彬、朴信惠等一眾演員都畀面出席。

精選韓流，喺晒《娛果》
http://fb.com/appledailyent