當年今日
關於我們

福田老北京酒家完全二十年代Feel

蘋果日報 2002/05/04 00:00


港人北上搵食,除咗酒樓大廚煮得一手好菜外,最緊要還是地方有特色,而且愈古老就愈有Feel。位於福田區嘅「鐘鼓樓」酒家,除咗有正宗地道嘅北京小菜外,其環境更以昔日20年代老北京面貌作裝修,所以令不少港客慕名而來。

記者:梁煒健 攝影:楊錦文
ImageGirl:MomoChu
裝修篇
鐘鼓樓的老闆張鑫是正宗北京人,雖然只有30歲,來深圳工作多年,但仍對昔日家鄉有一種特殊情懷。於是,張生特聘北京裝修師傅到來替其鐘鼓樓裝修,以昔日2、30年代嘅老北京古貌作為店內裝修設計,一枱一櫈,甚至大廳中嘅一座古老大木門,或門口處嘅懷舊電話擺設,均由北京運抵深圳,難怪深圳居住嘅北京人,老老嫩嫩都嚟鐘鼓樓懷緬一番。
食物篇
鐘鼓樓以正宗北京家鄉菜作招徠,喺深圳市唔係好多地方可以品嘗。部份菜式名稱與食物非常貼切,何況食物確實與別不同,不妨一試。
顧名思義「聽說菜」
小記聽見呢道會聽會講說話嘅菜式「聽說菜」,初時完全不知係乜嘢菜式,煮到埋嚟才發覺原來係豬耳炒豬脷。聽說菜係北京地道小炒,雖然有少許辣,但就非常爽口,香港食客必定一試。
香樁魚不是魚
?18就有炸魚食?非也,其實呢碟香樁魚只係外貌似魚,其實係將一種香樁嘅植物(實則為樹葉),以麵粉、蛋黃油炸而成嘅菜式。雖然香樁葉淡而無味,但有蛋黃及麵粉,入口時十分特別,混以椒鹽品嘗就更加正!
鹹鹹酸酸糟溜丸子
以豬肉製成的糟溜丸子,由於以特別油炸方法處理,所以烹調後嘅豬肉丸特別嫩滑彈牙,而其濃烈嘅醬汁,則令這道小食有種鹹中帶酸甜嘅口感,送北京拉麵一流。
北京著名甜品「三不沾」
「三不沾」其實係指不沾牙、不沾碟及不沾匙羹。被譽為宮廷式嘅布甸,黏性特高。雖然味道不算太甜,但就成為北京嘅著名甜品。
北京特飲福運泉
呢支由北京空運到深圳嘅福運泉,係北京特飲之一,味道有如酸梅汁一樣,是以野生酸棗果汁、蔗糖及菜蜜釀成,十分清甜易入喉。
鐘鼓樓
電話:(86-755)3207087
地址:深圳市福田區百花三路5號(藝術學校旁)
營業時間:10:30am-10:30pm
座位:約70個
交通:從羅湖關口前往,乘的士約15分鐘,車費約?25。
時尚銀器首飾大酬賓
由港人開辦嘅銀器專門店「SilverFour」,喺深圳市廣場受一班潮流人歡迎,就連港人北上消費時亦會到來幫襯。雖然已過了五一勞動節,但國內有七日長假期,SilverFour由勞動節開始直至5月14日,將大量銀器耳環減價發售,而且買滿?250貨品更可獲贈價值?180嘅銀器吊墜或電話繩㖭!
買滿?250送銀器吊墜
現凡在店內購滿?250銀器飾物,即時送你價值?120嘅方形純銀吊墜(約半吋大小),或一條價值?180嘅時尚銀器電話繩。兩者均以925純銀製造,絕非劣貨。
銀器耳環第2對半價
潮流人興戴耳環,很多時喜歡單隻佩戴。家陣SilverFour在5月14日前,將其純銀925耳環飾物大減價;凡購買第二隻時即可獲得半價優惠,就算買第三、第四隻耳環亦一樣有半價優惠,係咪非常抵買呢?
其他銀器吊墜推介
除咗有時尚耳環減價外,其實店內亦不乏設計獨特嘅銀器飾物,非常正斗,就算係原價,亦比香港嘅市價平一半有多。例如圖中三款吊墜,以右下角嘅「四月亮」吊墜最搶手,亦係「SilverFour」嘅鎮店之寶,售?312,價格稍高因為整件吊墜以實心純銀製造。
SilverFour銀器專門店
電話:(86-755)2250911
地址:深圳市羅湖區東門步行街T.O.T.時尚廣場D137號舖
營業時間:12:30pm-9:30pm
交通:從羅湖關口前往,乘的士前往約5分鐘,車費?12.5。