花車巡遊：今晚猛虎　遊尖嘴

蘋果日報 2010/02/14 00:00

恭喜發財！大年初一，當然要盡情熱鬧一下，今晚尖沙嘴有「國泰航空新春國際匯演之夜」，共有14架花車、13支國際及13支本地表演隊伍參與巡遊齊賀歲，並首次衝入彌敦道，讓大家近距離欣賞各具特色花車與中外嘅表演者，若想影張靚相，就記得去霸個靚位喇！

記者：許福合
攝影：陳盛臣
Model：Crystal@PureModels
盛裝熱舞巡遊賀歲
論熱鬧人氣度，都係巡遊大匯演好氣氛！今年請來26個國家同地區嘅表演隊伍，當中更包括國際知名的英國諾丁山嘉年華、日本盛岡Sansa舞蹈團及法國體藝消防員等。
empty
1.激鼓樂社會表演鼓樂，聲勢一流。
empty
2.毛妹芭蕾舞學校，本地嘅表演者，會大跳芭蕾舞同爵士舞。
empty
3.英國諾丁山嘉年華，會使用巨型道具去表演舞蹈，非常有特色。
empty
4.英國賽德伯青年管樂團，會表演步操演奏，好合拍o架。
empty
5.美國巴西舞蹈團，巡遊怎可缺少森巴舞女郎呢！
empty
6.鍾詠賢芭蕾舞學校，將會為觀眾表演芭蕾舞同爵士舞。
empty
7.日本盛岡Sansa舞蹈團，日本代表之一，會表演日本傳統嘅鼓舞。
empty
8.瑞士老虎樂團，同樣步操表演，不過會化埋個老虎裝，好應節。
empty
9.香島舞蹈會，佢哋比較有特色，會跳HipHop舞。
empty
10.法國體藝消防員，會以高難度表演體操項目，值得留意。
花車之最
今年花車一共有14架（上年只有13架），其中香港國家地質公園同優質旅遊服務協會兩架花車，都屬首次參加；早幾日旅發局就專程帶傳媒睇過花車嘅預備情況，邊架最靚？立即睇！
最靚造型　香港旅遊發展局

踏入虎年，老虎仔特別生猛！香港旅發局花車就特別體會到虎年氣勢！金銀雙主色花車，望落金碧輝煌，兼寓意人人金銀滿屋；車上有隻大老虎做指揮，帶領10隻生猛小虎，在巡遊時為大家推介香港今年主打節目，由傳統嘅端午節，到七人欖球賽都會落力宣傳！
empty
最有氣勢　香港賽馬會
今年係香港賽馬會125周年，巡遊花車特別落足本，車頭大大隻金色駿馬飛奔而出夠晒氣勢！而表演陣容更搵嚟數十位「天水圍青年舞者」同見習學員，示範「香港得得得運動十式」，並請來騎師蔡明紹、全運會馬術金牌得主林立信，同大家拜年。
empty
最搶鏡　泰國政府旅遊局
泰國係香港人最愛吃喝玩樂旅遊勝地，更有唔少人專程去拜四面佛；今年唔使借避年走過去喇！因為泰國旅遊局花車上，為廣大香港善信請來四面佛，並置身於花車最高位置，會祝福香港萬事如意，事事順利，再加上泰國舞蹈員在車旁大跳舞蹈，唔搶鏡都唔得。
empty
empty
■想學泰國舞，就要留意表演嘅舞蹈員。
empty
■有泰國傳統舞表演。
最娘設計　海南省旅遊局
海南島係近年力催旅遊新景點，但講到花車設計似乎唔多在行，加上車身大大個簡體字，若拍埋同場嘅中旅花車，唔講仲以為國慶又到！
empty
香港海洋公園：慳電環保
海洋公園嘅花車好講環保，70%材料用上環保物料，電量亦比以往花車少70%，車上更有一眾吉祥物同大家拜年。
empty
香港國家地質公園：至爆山歌
這是首次參加花車巡遊，車上有8景區，展示香港地質地貌；但最爆係請來一班貌似30、40後嘅鄉民唱山歌，夠晒出位！
empty
優質旅遊服務協會：勁賣LOGO
優質旅遊服務協會亦係首次參加，仲一次派出兩架花車巡遊，不過一堆商戶招標在身，似架廣告車多啲喎。
empty
昂坪360：風車轉運
花車上會滿載桃花及心形圖案，而桃花上更有風車圖案，會隨風轉動，新年轉大運。
empty
匯演時間
日期：2月14日（年初一）
時間：晚上8:00至9:30

注意事項：巡遊匯演舉行前後約兩小時將實施封路措施，請留意政府公佈。
新路線突入彌敦道
唔好聽到花車巡遊就走過港島霸位！今年巡遊匯演將採取新路線，並首次突入彌敦道！
路線先從文化中心出發，途經過天星碼頭、廣東道、海防道、彌敦道，去到喜來登酒店再轉入梳士巴利道，之後轉個彎返到新世界中心為終點。
沿線設有兩個表演區（廣東道新太陽廣場、iSquare國際廣場），供演出者停下來表演，但據知門券已基本售罄，早啲到附近霸個靚位，一樣可以免費慢慢睇！
empty
必霸靚位
A終點在望
新世界中心對出嘅平台，可以睇到巡遊路線嘅終點，估計一般花車同隊伍都會停留較長時間，影相睇Show都有較長時間，呢啲好位一定要霸住。
empty
B中間道兒童遊樂場
尖沙嘴行人天橋位唔多，呢個算較少見嘅制高位！視野闊，最重要係望落去嘅梳士巴利道，巡遊隊伍會在下面轉彎，停留時間較長，可以慢慢欣賞。
empty
C天星碼頭
花車及表演隊伍會由文化中心廣場出來，途經天星碼頭，視野夠晒闊，加上背景係鐘樓同廣闊嘅維港夜空，背景無咁雜亂，極適合拍照留念，亦係睇花車嘅好點。
empty
D海防道
海防道有唔少好點，例如呢個九龍公園徑兒童遊樂場，可望到花車轉入海防道，但由於企位較少，要霸就早啲嚟；如果想影相，建議起碼要配番支70-100mm以上嘅鏡頭。
empty
E彌敦道
彌敦道兩旁都有唔少地方適合影相，街道直長容易取景，若想拍張相片留念，記得帶埋支閃燈，咁就人景都影得靚靚喇。
empty
花車展覽
真係唔想逼，又想睇到花車的話，其實當巡遊結束後，於初二至初八，匯演嘅花車會分別於多個地點展出。

日期：2月15至21日（初二至初八）
地點：海港城、新世界中心、沙田公園、大埔林村