電盈（008）賣資產畀外資，由於被指不獲中央「祝福」，所以好多人認為賣唔成，其後電盈話佢係賣資產不是賣股權，所以毋須網通同意，一時間搞到市場都唔清楚發生咩事。
不過有芬佬話，基本上是一場鬧劇，而呢場鬧劇最終無論有冇結果，電盈資產賣得出又好，賣唔出亦好，只要電盈證明有買家肯出價621億元收購電訊及媒體資產，即使最終因為政治理由而終止交易，相信亦對電盈股價有好處，至少令市場知道原來電盈旗下資產咁值錢，必然引來市場重估電盈的價值。

中行（3988）A股認購反應唔錯，但仍以接近下限3.08元人民幣定價，與在港的H股定價2.95元相若，但就遠低於H股的現價3.40元。黑客話，如此定價或多或少有政治因素，因為如果定價太高，內地必有評論指中行對中港兩地股民持雙重標準，只照顧香港股民利益，日後內地金融機構來港上市，將會遇上更大的政治阻力，所以中行今次定價一定要照顧A股股民利益。況且A股定價偏低，未必會對H股構成壓力，因為市場好似預咗A股上市後會大幅搶高，較H股有溢價。
國新（1215）最近諗住變身內地礦業資源股，又話要引入策略性投資者，但股價始終炒唔起，噚日仲出現洗倉情況，之前信消息入市接貨的股民一頸血，真係慘情。國新昨大跌38%至0.031元，成交達2229萬元。
國新早前宣布與湖北省鍾祥市政府簽備忘，獲得該市磷礦鎮朱堡埠礦區約2900萬噸磷礦的獨家開採權，預計年開採量50萬噸。
阿虎