近日熱爆嘅無綫台慶劇《宮心計》，一班演員陳豪、鄭嘉穎、佘詩曼同楊怡等，噚日喺九龍灣宣傳之外，有份角逐頒獎禮獎項嘅演員仲即場拉票，認真勤力。之後玩遊戲時，嘉穎同阿佘呢對緋聞情侶繼續成為被玩對象，佢哋夾住個波走來走去，但係輸咗，監製梅小青笑佢哋冇默契，但係轉個頭當關菊英唱歌時，大家一齊為菊姐伴舞，嘉穎同阿佘好大方咁攬住跳舞，冇晒避忌仲不時傾偈。

答案一樣好默契

問阿佘俾人話同嘉穎冇默契，阿佘話：「都係玩遊戲啫。」咁私下有冇默契呀？佢就話：「好朋友囉。」之後同一個問題再去問嘉穎，嘉穎就話：「一直都係朋友。」個答案同阿佘一樣，佢就笑住話：「咁即係有默契囉，冇夾過答案都一樣。」記者指佢哋心有靈犀，嘉穎就話：「咁又唔好去到咁盡。」
有傳楊怡怕咗鄧萃雯，所以唔敢爭視后，楊怡話：「其實都係平常心，可以同雯女一齊角逐已經好榮幸，冇話乜嘢怕同唔怕。」
此外，關菊英同謝雪心等噚日到尖沙嘴出席「國慶六十周年仁濟長者同學日」活動，抱恙在身嘅菊姐話因為最近好多排練，所以唔夠休息，佢話：「我喺台慶會同米雪玩纓槍，而且每次配合《宮心計》做宣傳都要化成個鐘頭古裝，提早好多起身，所以希望放假可以去玩。」人氣急升嘅謝雪心噚日仲一連出席3個活動，對於最佳女配角呼聲甚高，佢就謙虛話唔好咁講，又承認去年已簽TVB做親生女。