【李八方online】律政中心人去樓空 「骹主」離岸辦公？
蘋果日報 2019/12/02 20:32
英國倫敦律政司骨折李八方ONLINE鄭若驊甩骹律政中心骹主
律政司司長鄭若驊上月14日訪問英國倫敦期間，遇到示威者抗議，仲喺混亂間跌倒，左手手腕部份甩骹。因為被發現甩骹咁「重傷」都可以着樽領衫而被網民封號「骹主」嘅司長喺英國出席完活動之後就冇再露面。香港風雨飄搖，法律問題一籮籮，好多人都打鑼咁搵司長，但原來司長做完手術放緊病假，不過律政司話司長會繼續處理公務。
司長之前公開表示佢嘅左手手腕部份脫骹，需要用鈦金屬板及骨釘固定骨折部份，又話醫生都話佢嘅左手將未能正常運作至少3個月至1年，仲未來可能要做手術釋放神經。
司長受傷之後，香港法治危機、法律問題一浪接一浪，包括人大法工委話香港法院無權判法例違憲，今日再有議員提出修訂《公安條例》，到底司長幾時出嚟回應吓？律政司今日就回覆八方，話司長接受手術後放緊病假，其間司長仍然繼續處理公務。
由於律政司冇署任安排，所以喺律政司司長缺勤時，有關嘅法律專員會就會行使律政司司長嘅權力，並執行佢嘅職務，包括出席立法會、轄下委員會、小組委員會同事務委員會會議，以及代表政府發言。律政司話，目前有部份工作，由於司長尚未完全康復因而不能處理，例如出席活動等，咁到底司長返咗嚟香港未呢？律政司就冇回應啦。