現年30歲嘅韓國「國民妹妹」始祖文根英，今年2月患上急性骨筋膜室綜合症，先後接受四次手術先免除截肢，之後文根英工作全面喊停，專心休養。

由於文根英有份主演嘅電影《玻璃庭院》，將作為下月舉行嘅「第22屆釜山國際電影節」開幕電影，文根英今日下午亦有現身記者會，今次亦係佢自患病後首次現身。穿上黑色短裙晒腿嘅文根英狀態非常好，佢表示：「以前已經出席過幾次釜山國際電影節，不過今次係第一次攜自己嘅作品參加釜山國際電影節，真係好開心。」

《玻璃庭院》講述神秘嘅博士生在妍，為逃避現實而躲進名為「Green House」嘅空間，之後成為神秘案件中嘅主角，而文根英希望透過角色令大家見到佢於演技上有新突破。

另外，由宋仲基、蘇志燮及黃政民等人主演嘅《軍艦島》，其導演版將於釜山國際電影節上映。