【娛講Video Talk】項明生俄羅斯遭警察打劫：唔好以為差人就係好人
蘋果日報 2019/12/27 22:30
陳慧敏項明生張惠雅娛講
《娛講Video Talk 》今集請來歌手陳慧敏（Vivian）、Hotcha前成員張惠雅（Regen）及旅遊達人項明生做嘉賓，梁梓禧（Roland）任主持，分享一個人旅行心得及難忘經歷。
慧敏哥早前一個人到埃及自遊行時被性侵，今集她重提當日經歷仍有餘悸：「佢突然抱起我喺佢身度chok咗3次，我已經好驚……唔係諗佢搞我，我係驚佢係變態佬。」
項明生就試過在俄羅斯遭當地警察持槍打劫，他說：「你唔好以為差人就係好人，唔止香港有警察不受歡迎事件，外國啲差人唔係全部都好人。我試過喺俄羅斯莫斯科，當時坐火車去聖彼得堡，突然有個差人查身份證，攞passport畀佢睇，佢一睇就話我張相唔同，張相好多年前影，頭髮梗係有啲唔同啦，跟住佢問我銀包有幾多錢，攞晒我銀包啲美金走，話如果唔係就要跟佢返差館。」項明生表示，警察聲稱那些是罰款，自己一位女友人之後試過同一遭遇，但女友人寧返警署也拒讓警察取走銀包金錢，結果在警署被警察清洗一空，取走所有財物。
Regen也曾試過在俄羅斯街上使用wifi返港後，IG戶口經常被hack，而她試過去西藏旅行時遺失護照、所有證件和信用卡，項明生就教路：「我會影張相（passport）放喺雲端度，即使唔見銀包唔見passport，你上網吧攞返個copy，你都可以去領事館證明呢個係我嚟。」
明年Regen會到美國西部徒步旅行5個月，她指是2014年看了美國傳記冒險電影《那些年 我只剩下勇氣》後，一直有此心願，最後決定明年展開。Regen：「好想去一個可以同自己對話多小小嘅徒步旅行。」
Regen表示一個人旅行樂趣，是接觸大自然時自己跟自己傾偈，靜靜地留意身邊的事：「諗吓自己做過啲乜，有冇要悔過。」慧敏哥最開心是結識新朋友，跟人互相幫助，更珍惜友情。Roland問Regen和慧敏哥有何建議給獨遊女性時，慧敏哥表示遇到一些想呃錢的人時要特別擺出強勢和堅定：「我試過喺伊朗，我係畀咗錢佢，佢再問我攞錢，我話畀咗錢你，你唔可以再攞，落車有30幾個男人叫我畀錢，我堅決企咗喺度同佢講，我係畀咗錢佢，如果我冇畀錢佢，我發誓即刻死喺度，我堅定同佢講我唔會再畀錢佢。」慧敏哥表示街上跟密室是兩回事，街上可求救及逃跑，所以建議女性一個人旅行盡量避免獨留密室。
慧敏哥早前到土耳其旅行時結識了新男友，她表示男友剛找到工作，希望能儲錢買機票到澳門跟她見面。
陳慧敏在土耳其結識了新男友。（IG圖片）
陳慧敏、Regen和項明生在《娛講》分享一個人旅行心得，梁梓禧擔任主持。
陳慧敏早前到埃及、印度等地旅行100日。（IG圖片）
項明生6、7年前試過在俄羅斯遭當地警察持槍打劫。
Regen難忘到尼泊爾高原經歷。（IG圖片）
Regen 明年會到美國西部徒步旅行5個月。
陳慧敏講述埃及遭性侵經歷。
主持梁梓禧自言十分喜歡旅行。
項明生教大家將護照copy放上雲端。