小初昨日講到中國水務（855）搞批股，但漏講咗中油潔能（260）亦停牌批股。中油潔能昨以先舊後新方式，每股0.52元，配售1億股畀兩個投資者，分別係荷蘭銀行及新揚投資，集資5200萬元。

中油潔能接貨即賺

由於中油潔能只係配股畀兩個投資者，唔係通街派，所以昨日復牌並無沽壓，股價升4.92％，收0.64元，承配人賬面立即賺0.12元。
講起能源股，新海能源（342）呢排股價都見異動，雖然成交唔係太大，但就升得唔錯，昨日升9.86％，收0.78元，成交股數448萬股，金額338萬元。
新海股價去年3月升上1.27元高位，跟住一路係咁回，去年8月跌至0.445元才喘定，但芬佬如金手指等，不但未見沽貨，反而增持。近呢一個月終於走勢有番起色。
經紀陳話，近排二三線股輪流批股，據講新海亦在傳聞之列，但就話唔係現水平批出。
慕容小初