有祖國撐住嘅港股真係唔同啲，花旗嗰邊危危乎，港股越升越有，昨日港股又升500點，升多6點就到24000。
花旗嗰邊仲「立立亂」，不過政府同聯儲局都度緊搞救市，暫時應該可以喺高位反反覆覆，對港股下禮拜推向25000有幫助，雖然𠵱家距離25000仲有1000點，但係大家呢排見過風浪，1000點上落其實濕濕碎，快嘅一兩日就到，慢嘅都應該唔使一個禮拜。
咁𠵱家買乜嘢股好，最穩陣又值博嘅唔使講都係「六行三保」，因為佢哋前景好，啲錢又追住佢哋買。

先幾日資金追住國壽（2628）同平保（2318），唔難理解，佢哋嘅業績好，又係恒指成份股，炒高嚟結算點可以少得佢哋，昨日升幅唔算大，成交縮咗，因為升得多要唞吓氣。
𠵱家結算完咗，保險股又唞緊氣，大家應該諗到下禮拜會開邊瓣，呢兩日啲國內銀行股郁郁吓，升幅唔算大，但個勢就好好，工行（1398）、建行（939）同中行（3988）都係恒指成份股，恒指推向25000，要靠佢哋。
工行C輪1791：俊樺禮拜四介紹過隻工行C輪9600，當時工行做緊4.86元，話咁快昨日又去到5.10元水平，破位睇5.60元，加碼可以買9600或者1791，1791昨收48仙，槓桿率10.6倍（有效5.4倍），對冲值0.5，正股升上5.60元，1791應該唔會低過78仙，有6成升幅，如果正股升上6元，隻輪就會喺1.06元樓上，正股跌穿4.85元止蝕。