星二代近年不斷冒出，24歲的林鈺洧由無心做娛圈，先入行做模特兒、拍電影，繼而拍劇，這個過程中也拉近了她跟父親、80年代小生林俊賢的父女關係。因父母在她一歲半時已離異，林鈺洧坦言15歲前未見過林俊賢，現在父親會以過來人身份教女兒演戲，而難得是林鈺洧真的覺得受用。
撰文：王連連
攝影：葉君海

林鈺洧挾着80年代當紅小生父親林俊賢之名入行，但原來她15歲之前，與父親零交往，至九年前才靠facebook與爸爸重遇，之後入行獲授娛樂圈生存之道。

商科畢業的林鈺洧，對娛樂圈並沒有太大興趣，在2015年由朋友介紹開始做模特兒，「由細到大，親朋戚友見我生得好高，讀書喺班內都係排最尾一個，叫我大咗做model，可能太多人講，反而唔係太想入行，大大吓出嚟做嘢，有人介紹我見模特兒公司，當時返工時間自由，所以有時間做model試吓。」求學時為賺外快，做過補習老師、侍應、幼稚園保母、保險兼售貨員，但始終找不到一個方向。

受里安納度影響

不過林鈺洧小時候作文課「我的志願」曾想做演員，「讀書時有參加話劇團，做吓舞台劇，只係讀商科接觸戲劇機會少咗就放低一陣。17歲左右有日放假喺屋企睇電視，睇里安納度狄卡比奧（Leonardo DiCaprio）嘅《羅密歐與茱麗葉：後現代激情篇》（Romeo + Juliet）時就驚訝，如果將來我可以參與到一樣咁靚嘅嘢就好，女主角着嘅天使衫好靚，好想大個可以咁。」

反而父親林俊賢的演藝作品，林鈺洧卻從來沒有看過，「我冇睇過佢做戲，唔係特登，我由0至15歲都唔知爸爸係林俊賢。有次去佢屋企，見佢電腦明明有個file係佢自己嘅戲，見到我望，佢立即遮住電腦螢幕叫唔好睇，話好核突。我問佢有乜核突，佢話套戲入面佢做強姦犯，我想睇但佢唔畀，可能佢唔想我覺得爹哋有呢一面。」林鈺洧比很多演員有優勢，可以隨時有「老師」請教，她遇上有困難也會問父親：「佢都犀利，可以畀到好多意見我，有時覺得入唔到個角色，我都會問佢，佢叫我畀耐性同時間。做戲講求好放鬆，佢教我每個演員有自己嘅放鬆方法，佢可能深呼吸就得，我就要再自己搵。」並謂父親林俊賢很緊張她的演藝工作，半夜會突然傳訊息給她，教做戲方法。

一日會傾幾次偈

因為決定從事演藝工作，林鈺洧與父親的關係也拉近，「做model時同佢來往都唔多，自從決定做演員，對話多咗好多，我哋WeChat對話，一日傾幾次。以前係會問候，生日都會上去屋企，做到足，𠵱家對話有來有往，唔單止係寫生日快樂，佢畀個笑就冇，會一句句對答。我會搵次同佢一齊睇佢嘅戲，搵咗之後帶電腦同佢睇。」但她坦承現在感受到星二代的壓力，外界會把二人比較：「我出嚟唔止代表自己，亦係代表緊佢，所以有啲壓力。」

現時正修讀演技課程，林鈺洧也打算到美國荷李活星級演藝學校讀短期課程。她在ViuTV劇集《詭探前傳》中，做個被鬼上身的女仔，不斷在家練習，但拒絕在父親面前試戲：「輪到我唔想，等我將來有多啲信心先畀佢睇，相信一定有機會。」
化妝：Kyo Lee
髮型：Chris Lam

【自覺靚過父親】

林鈺洧為林俊賢與中英混血前妻所生，憑34C、25、34兼43吋長腿殺入模界，做Angelababy師妹。林鈺洧一歲半時父母離婚，與媽媽在英國生活，由媽咪湊大，所以她在訪問中曾表示覺得似媽媽多一點，「媽咪靚過爹哋，我成日都會同媽咪傾心事。」到九年前才靠facebook與爸爸林俊賢重遇。

林俊賢為80年代當紅小生，成名作有《男兒本色》，曾經歷兩次破產，又有過兩段婚姻失敗，之前曾在娛圈消失20年，到2015年才重返幕前。

更多精采時尚內容，盡在 http://add.appledaily.com。