港大法律學系助理教授張達明嘅太太Portia三個月前末期乳癌過身，張教授𠵱家心情已經平復，全情投入工作同照顧一對仔女。佢噚日同八方講，太太04年乳癌復發，今年情人節前夕入院檢查，醫生突然話佢得番兩個禮拜日子，驟聞噩耗，自言「硬淨」嘅張達明都不禁流下男兒淚。

為𠱁太太開心走埋最後一程，張教授即刻喺醫院搞咗個惜別會，請咗300幾個親友。兩夫婦喺會上再次交換結婚戒指，再講多次順逆與共嘅盟誓，惜別會後三日，Portia喺丈夫懷中過身，張達明特登響佢哋14年前結婚間教堂搞追思會，象徵太太永遠係佢終身伴侶。
張達明噚日喺港大「美善生命計劃」開幕禮分享呢件事時，在場者無不動容眼濕濕，最冷靜反而係佢自己。佢話𠵱家首要係照顧好一對分別10歲同12歲嘅仔女，「𠵱家冇哀傷，只有唔捨得。太太喺天堂，第日可以同番佢一齊。要面對嘅係點樣適應單親家庭生活，個仔一向好黐媽咪，情緒仲未平復。」
呢個計劃係港大社會科學學院籌辦，賽馬會資助2,000萬元，會訓練3,000個輔導人員幫助末期病患者同家屬面對死亡，預計會幫到8萬人。