家玩投影機唔係男仔專美，都有唔少女仔玩，好似Samsung第一次殺入投影機巿場，推出咗一款便攜式迷你投影機，連好姊妹A.Lin都鬼死咁鍾意，攬埋上身話好輕，想買番部玩吓大投影喎。
三星資訊科技產品總監Joseph話，家啲人對投影機需求好大，想睇吓大畫面嘅效果，特別唔使安裝咁麻煩，可以拎住周圍去嘅便攜式投影機。

機身唔夠兩磅重

Joseph話，好似呢部P410型號迷你投影機，重量唔夠兩磅，闊、深、高分別係5.8吋×5.7吋×2.5吋，放入電腦袋或公事包就可以周圍走。另一特別地方設有USB接口同自動播放功能，插隻USB手指就可以自動播放音樂、影片或者圖像檔案，仲內置埋兩聲道喇叭，即插即播，女仔都識得用。
部機當然有標準AV同個人電腦接駁口，可以連接到手提電腦、攝錄機、DVD機等影音產品，最大可以投到80吋畫面，對比度1,000：1，影像最高可以兼容到720p。P410採用LED光源，使用壽命長達30,000小時，賣價約5,000蚊。
Joseph又話，今次除推出便攜式投影機，仲一口氣出咗家庭影院投影機同商用投影機，好似入門級家用全高清投影機SP-A600B，採用DLP光學引擎，1,000流明光度，對比度3,000：1，賣價15,300元。海豚式流線設計嘅外形，夠晒高尚品味。商用投影機D400嘅最大賣點，亮度高達4,000流明，開住燈睇都好清楚。
電郵：mailto:[email protected]