鄭希怡（Yumiko）、湯怡、李施嬅同莊思敏，今日去到跑馬地為莎莎婦女銀袋日行騷，Yumiko着住白色喱士低胸裝最搶鏡，原來生完囡囡涼浸浸後，Yumiko嘅上圍急升一cup，今日見佢甚有睇頭，問佢有冇做手腳谷胸？Yumiko話：「push就正常啦，今次馬天佑揀呢套衫畀我揀得好好，令到我咁都得！」Yumiko話o依家湊BB，好少着得性感，但喺生之前就應承過自己一定要fit過以前，加上升埋cup，難怪佢話好滿意生完BB嘅狀態，但佢就話老公好少讚佢嘅body，一切在心中。既然生一個可以升一cup，記者就提議Yumiko再生，佢就話：「遲啲諗吓先。」問到老友徐濠縈同何超儀鬧不和，Yumiko就話：「唔會，咁多年姊妹，我哋不時都會有聚會。」

同場嘅湯怡噚日29歲生日，佢就話男友洪卓立預備咗份神秘禮物畀佢，但要月尾先送到，到o依家都未知係乜，但喺前日一班朋友就送咗驚喜畀佢，佢話：「16號飲完返屋企，用咗1分鐘開門，原來Regen送surprise畀我，但我就有少少驚嚇，一開門見到個真pat pat，原來係Regen用唇膏喺pat pat寫咗生日快樂，佢仲送咗支唇膏畀我，好彩當時佢夾實咗，女仔朋友冇乜所謂。」