暗中作樂，但暗中操控「音樂」的人，所作的，很多人都不曉得。

音樂無分種族國界，就算你身體上有缺陷，只要有才華、夠天份，理應得到平等待遇，但在香港，未必。

出色嘅盲人歌手，美國有Stevie Wonder、意大利有Andrea Bocelli、台灣有蕭煌奇，佢哋嘅成就有目共睹。

其實喺27年前，香港樂壇都出過一個盲人歌手，他的名字叫梁球，那年他36歲。

梁球最後沒有名成利就，反而因為歧視問題，最終「被」消失於樂壇。所幸梁球未有因此意志消沉，一個華麗轉身轉投公益事業，為視障人士爭取權益，同政府、政黨對着幹。現時遍布全港的電子行人過路發聲裝置，也是梁球倡議引入，但當時他卻備受政黨抨擊，指他「多事」，甚至有人指摘這裝置對市民構成噪音壓力。

【有電台拒絕播自己嘅歌】
今年63歲嘅梁球，相隔廿載再次出碟，佢話：「會出一隻唱片，我大概會有6首歌，其他會係有一啲年輕人嘅，會好快聽到。」

梁球日前接受《蘋果》專訪時，慶幸今日終於有機會解開27年前在樂壇「被」消失之謎，他說：「出咗第一隻碟之後，其實當時我已經係錄咗第二隻同第三隻細碟，不過冇機會出街，因為當時我嘅經理人同唱片公司發生咗私人問題，導致本來嘅計劃冇咗，佢同公司關係轉差，公司將我所有嘢停晒。

「當時業界有一個講法，梁球唱片賣得，係因為聽眾觀眾同情佢係一個盲人，意思即係梁球係唔使識作歌、填詞、唱歌，唱得好唔好唔需要理，全部唔使理，只要你係一個盲人；公司係賺緊錢，經理人有問題，咁點解會搞成咁？因為梁球係盲人，同情佢係盲人。

「因為呢啲咁嘅傳言，之後冇公司會同梁球簽約，聽落好似好荒謬，但係當時業界對盲人、對梁球唔係好受落。」梁球指當時因為有呢個謠傳，所以有電台拒絕播自己嘅歌。

27年前，梁球推出過幾首hit歌，包括《讓我展能》、《風中奔馳》、《思憶》等，佢話：「啲外國、大陸朋友都會喺卡拉OK唱我嘅歌，就算到今日仍然係卡拉OK嘅song list裏面，仲有一班網民，將我嘅歌放係YouTube，所以我好感動、好感恩，佢哋呢種鼓勵，幫我打破咗當年話『支持梁球都係因為佢盲嘅』呢個謊言，所以我係好感激聽眾。」

【稱吳婉芳甄妮講明「我唔唱梁球啲歌」】
梁球過往嘅遭遇，係唔係被歧視？他說：「有兩個問題存在，第一，我唔可以唔相信呢個係一個非常嚴重嘅殘疾歧視。我舉一個好簡單嘅事例，喺1989年做一個直播嘅騷，個騷係同慧妍雅集有關，有一個老牌歌星，一個係香港小姐，我記得係吳婉芳，歌星就係甄妮，佢哋兩位都拒絕咗導演，當住我面前講『我唔唱梁球啲歌』，導演又噅又o氹，因為個騷係直播，結果真係on air，到嗰兩位唱時，佢哋就喺度交談，冇唱歌。」

呢啲事，其實唔止發生一次，梁球話喺另一個活動時，去到大合照時間，佢一埋位，其他人彈開晒：「成班stand by，當梁球一埋去，本來企喺度嘅人唔見晒，閃呀！全部閃！可能閃剩一、兩個，可能佢覺得我唔知道，同我影相係有啲羞恥，或者係down grade咗佢哋，呢啲情況係唔止一次，我睇唔到，但係我感覺到，佢哋嘅腳步聲離開，結果個局面好僵，我都無謂夾硬企埋去，所以我絕對相信，當時啲人話，我嘅碟賣得係因為我係盲。

「其實未到出碟前，公司叫sales去派台，有sales拒絕幫梁球派碟，其實整個業界，有部份人係唔接受梁球，除咗係歧視，仲係有損壞佢形象，同佢一齊係一件唔光彩嘅事，所以先會發生呢啲事。」