釜山國際電影節今日踏入第二日，噚晚喺開幕禮紅地毯上低胸示人嘅韓國女星孫藝珍，今日就改穿長衫長褲，出席同台灣男星陳柏霖合演嘅中韓合作新片《壞蛋必須死》記者會，雖然孫藝珍打扮密實，但側身睇，嘩！上圍依然有睇頭。

陳柏霖透露今次首度同孫藝珍合作就要被對方打，覺得好有趣，當被問到覺得韓國女星之中邊個最靚時，佢諗都唔諗就答：「梗係孫藝珍啦！」而孫藝珍亦對陳柏霖有讚冇彈，「雖然韓文對白好多，但佢都好努力去做，好演員係唔分國籍嘅，佢就係好演員喇。」

至於曾演出韓劇《懷抱太陽的月亮》嘅16歲女星金裕貞，今日就着咗對超高踭鞋出席新片《秘密》舉行嘅戶外見粉絲活動。話晒對鞋都好高，真係一步一驚心，所以電影兩位男拍檔孫浩俊同成東日都好照顧佢，扶佢上落台，以免金裕貞仆親。成東日好感慨咁話自己同金裕貞好有緣，「第一次見金裕貞係佢7歲嗰時，當時要拍攝劇集《熱血仁心》，裕貞都記得呀！」