里約熱內盧奧運冇「閃電」保特？男子100米跑世界紀錄保持者保特，喺牙買加奧運田徑遴選賽嘅男子100米決賽開賽前，因為鼠蹊受傷而退賽，雖然情況唔算嚴重，但係喺距離里約奧運開幕前一個月多啲嘅時候先嚟受傷，都唔好話唔令人擔心。

退出百米決賽仍入奧

保特喺自己嘅twitter發聲明話：「喺100米初賽之後，我已經覺得鼠蹊有啲唔舒服，喺準決賽之後情況持續。經賽會首席醫生檢查過之後，證實係第一度撕裂。」第一度撕裂喺鼠蹊傷入面係最輕微嘅，通常唞一個禮拜就冇事，而由於牙買加田總係容許選手只要有醫生證明，就算唔參加遴選賽都唔會影響佢哋參戰奧運嘅資格，所以保特仍然可以去里奧爭衞冕100米、200米及4x100米接力。不過，保特近年狀態都麻麻，喺遴選賽嘅100米準決賽亦只係跑出10秒04，所以佢都自己知自己事，話會喺七月22日嘅鑽石田徑聯賽倫敦站，證明自己嘅狀態喎！
講番場男子100米決賽，結果由禾漢比歷克以9秒95封王，艾殊美迪以0.01秒之差屈居亞軍，而新星明斯就以10秒02得季軍。