需知道維園阿伯係香港言論自由象徵,殖民地年代尚且容得下佢哋盤踞維園大鳴大放,想不到回歸後人民當家作主,維園阿伯卻要靠邊站,八方本着雖然我不同意你說的話,但我誓死維護你說話的權利呢個人道原則,嚴正要求港台即時整頓《城市論壇》,還香港社會河蟹,禁止草泥馬橫行。
保皇黨議員擔心出席《城市論壇》人身安全受威脅,港台應該考慮將論壇他遷,免得維園阿哥衝擊嘉賓,況且康文署轄下又唔係只得一個維園可以開壇,實情大把地方選擇。港島區首選動植物公園,嗰度有多個巨型獸籠,安排保皇黨議員坐在籠中發言,八方保證,無論講乜都百分百安全,掟蕉飛bra固之然唔使怕,榴槤飛埋嚟面前都不動於色。之不過保皇黨埋位前要清場,逼珍禽異獸聽佢哋講嘢,縱使唔係人話,恐怕都有虐畜之嫌,港台同康文署不可不察。
另一個場地,八方推薦位於大西北嘅濕地公園,該處遠離繁囂,水天一色,最宜坐低飲杯茶、食個包,暢論家事國事,而且此處乃都市神獸貝貝之家,好多人去濕地公園都係想親眼睇吓香港罕見嘅灣鱷,香港獨特政制下嘅怪胎功能組別議員,稀罕程度媲美灣鱷,仲冇咁容易絕種㖭。