鍾嘉欣、陳展鵬、黃浩然、唐詩詠同楊思琦,今日喺電視城為新劇《大藥坊》試造型,嘉欣啱啱同展鵬喺《巨輪》飾演情侶,以前又試過同黃浩然做一對,今次佢就周旋喺展鵬同浩然之間,展鵬話唔擔心觀眾會覺得悶:「今次仲有唐詩詠加入發展四角戀,而且我同嘉欣喺尾聲先會有感覺。」
嘉欣BB就話覺得呢次角色對佢嚟講係好有難度:「我會有好多藥名同中醫術語既對白,真係12級難度,依家收咗5集劇本,唯有靠死背咗先。」
最近嘉欣因為被發現同展鵬同車而傳緋聞,今日佢哋兩人合照期間好尷尬同拘謹,嘉欣即刻耍手兼擰頭否認:「冇呀!冇呀,只不過覺得著咗套戲服,覺得自己好高貴啫,我哋喺化妝間都有傾偈。」咁講返老闆何哲圖(Herman)有意將嘉欣捧為星夢一姐,嘉欣笑笑口話:「我冇聽過,一定係流料,Herman一向一視同仁,冇一姐同小姐之分。」