兄弟如手足，爭產的結局。從事物業糾紛的「事務何」就話爭產案無日無之，咪以為只在大家族才會出現，爭產嘅嘢無分階級，大有大爭，小有小爭。

乜太有5個仔女，有層天水圍嘉湖山莊，層樓一直以佢個人名義持有。做人好化學，2013年前證實末期癌症。大仔、二女及二女婿就同佢簽咗一份承諾書，寫明二女及二女婿負責乜太生活費及各項開支包括工人、醫療、居所、生活、交通及身後事費用等，如果履行呢啲承諾，乜太亦承諾身故後將呢層嘉湖山莊贈送予二女及二女婿，大仔係見證人，同時係母親遺囑執行人，遺產受益人包括大仔、二女及二女婿，及二仔。

2013年乜太層嘉湖山莊加咗二女及二女婿個名，土地註冊處文件睇到層樓由3人聯名持有，當時作價近市價300萬元。爭產嚟啦！二仔見到阿媽層樓加咗阿妹同妹夫個名就興師訴訟。但當時乜太仲在生，法庭話，只有乜太先有興訟嘅權利，咁二仔就中止訴訟。

2016年乜太逝世，二仔就係佢媽咪離世嗰日嘅早上，再興訴訟，最終與大哥、阿妹及妹夫對簿公堂，告狀就話佢哋三人欺騙母親。二仔話阿媽唔識英文，唔知道當時轉讓業權時咩叫「長命契」，呢個加名行動，二仔事前完全唔知情，並提供一條母親影片，片段記錄母親並唔知道二仔被安排於局外。又指控明明承諾書係阿媽生前得到照顧，喺死後先將單位轉送，點解未死就喺層樓加咗阿妹同妹夫個名。

法庭同意，單位業權轉讓與承諾書有出入，阿妹同妹夫未實踐照顧乜太，就將單位由乜太獨自擁有變聯權共有，就算佢哋無履行照顧承諾，乜太都無能力從佢哋身上取回業權權益。但唔可以單憑轉讓就話阿妹同妹夫欺騙母親，而佢哋嘅誓章指，呢個做法係母親嘅意願。判詞指：「當欺騙只是可能性之一，而不牽涉欺騙成份的可能性同樣地存在，欺騙的推論便不可能構成較大可能性的結論。」而且二仔提供母親嘅影片，沒有正面指出乜太簽署文件時是受騙或受誤導。最終法庭命令撤銷二仔嘅上訴，並須支付共18萬元的訟費。

嗰層由阿妹同妹夫持有嘅嘉湖山莊喺2018年以655萬元甩手。

林雨菲
https://www.facebook.com/lamyufei520

屬於香港人的移民攻略
立即登入【全球樓行】
Dream House零距離