亞視營運總裁馬熙前日「承諾」，盡力喺今日一次過清還欠薪，但據知情人士透露，股東間出現錢銀糾紛，相信成功出糧機會不大。

今日亞視員工正常返工，未有員工停低受訪。總台門外水靜鵝飛，公關表示暫未有新回應。

下晏兩點鐘左右，亞視財經節目《理財博客》主持章佳強現身，接過觀眾馬先生送俾佢嘅咖啡粉，並停低受訪，表示收到消息，指今午三點出糧。

章佳強稱:「到呢刻暫時未等到出糧，暫時等公司通知，希望公司咁艱難時候都可以渡過，今日都好開心嘅，過年前有個觀眾馬先生入o黎買啲禮物嚟，希望嚟緊如果有轉機都希望繼續留喺度發展。（係咪話今日收支票？）頭先講話三點鐘會出支票，o依家未有，十二月同一月都未有。（會唔會想今日都出唔到十二月，會有咩打算？）咁都會跟番10A(《僱傭條例》10A條辭)，但暫時都會留守住先嘅到最後一刻。（跟據往績畀咗支票你會否兌唔到？）我未試過，之前有聽過有同事就兌唔到。」

章佳強表示昨日與今早也聽過秘書透露會於今日下午三點時發放所有支票給員工，至於會發放邊個月嘅人工？佢指係十二月同一月人工，而支票係現金支票。問到若果出唔到糧，會考慮幾時走？佢話：「我哋節目仲有兩個廣告喺度，咁如果仲有人手會繼續留守喺度，去到牌照完之前，睇公司發展，會留守到最後一刻。」至於員工士氣，佢指大家心態都係抱觀望態度，基本上好多人都係睇埋三點鐘會否出票，好多都好似會留守同睇埋發展先。

但公司遲遲唔出糧，不覺公司過分？章生竟然話:「又唔會，因為由舊年已經睇到今年經濟環境係會差啲，唔單止媒體，其他行業都係，公司啲老闆喺內地嘅財力唔係有太大問題嘅，好似資金都OK，可能係其他方面支配運作有啲阻滯。」

「出糧係好緊要，但其他持續發展都好重要，喺運作上亦冇可能要投資者長期擺錢喺度，公司運作唔到其實都唔係好健康0架嘛。我點解留守到最後呢？因為公司本身係想開財經台，我都係想同佢一齊搞，但如果中間有啲運作未行到嘅時候，KICK住咗。如果啲資金運作到，希望可以繼續搞埋。」可擔心節目被腰斬？佢就話暫時不會:「因為我哋依家都有兩個節目喺身，去到三月底。」