華華上月尾講過，新股掛牌當日，上市儀式完咗，港交所（388）會將儀式用嘅燒豬頭尾畀番公司主席，寓意好頭好尾，不過，燒豬頭尾唔可以曝光，否則會好唔老利，中國重汽（3808）就係例子，股價上市即跌。
唔知港交所係咪睇見華華咁講，為免再有「不愉快」事件發生，上個禮拜中國中鐵（390）上市，港交所冇再畀燒豬頭尾，寧願攞少少錢出嚟，送隻駿馬造型嘅琉璃擺設畀中鐵董事長石大華，寓意馬到功成，意頭好，冇顧忌，曝光任影都唔怕。無獨有偶，石大華回禮畀港交所嘅，亦係一隻駿馬嘅琉璃擺設，不過兩隻馬形態各有特色。
有時真係唔好唔信邪，中鐵終於破咗近排新公司上市潛水嘅詛咒，首日升27%。