日聯盃四強周日全部誕生，但在聯賽高踞榜首的鹿島鹿角就冇份，雖然次回合喺主場3:2反勝仙台維加泰，但總比數仍輸4:5出局。

鹿角首回合作客已輸1:3，今場返回主場要力圖反撲，點知又先失兩球，被維加泰領先至總比數5:1，雖然之後鈴木優磨梅開二度，同埋18歲仔嘅安部裕葵亦有入波，反勝3:2完場，但仍然要提早執包袱。

另外三場波，首回合互交白卷嘅大阪櫻花同浦和紅鑽，次回合再賽和2:2，但就益咗櫻花以作客入球優惠晉級，而同市嘅大阪飛腳亦順利入四強，主場靠長澤駿同泉澤仁下半場各入一球，贏神戶勝利船2:0，亦以呢個總比數晉級。不過，最威都係川崎前鋒，作客竟然大炒FC東京5:1，阿部浩之大演帽子戲法，而巴西外援艾辛奴費拉拿亦入兩粒，總比數大炒對方7:1過關。