中環在線:周松崗退任
李小加:得閒返嚟坐吓 - 李華華

蘋果日報 2018/04/26 00:00

中環在線李小加周松崗李華華

周松崗(CK)噚日喺港交所(388)股東會後就正式退任主席,佢再有感而發,話過去6年完成三件大事,包括是係收購LME、互聯互通開通及同股不同權嘅上市改革,有賴監管機構同市場業界支持。
企喺身邊嘅李小加就借住呢個機會笠高帽,多謝CK一直「默默支持」,形容佢係智者又係勇者,視對方係「一輩子嘅好朋友」,CK走咗會非常想念佢嘅智慧,希望對方繼續活躍政商界,得閒返嚟交易所坐吓。
認任內有Regrets
退任之後嘅周松崗仍然會做行會成員,同時係友邦(1299)董事,亦擔任不同公職,笑言「其實6年前已經退過一次休,𠵱家係分階段退休」。喺任內港交所失落阿里巴巴,沙地阿美又暫未落戶,周松崗話呢啲叫做「失之東隅,收之桑榆」。唔明?即係塞翁失馬,上市制度改革後,佢希望創新企業來港變成「10個8個阿里巴巴」,又引用Frank Sinatra嘅《My Way》歌詞,話「Regrets, I've had a few」,有咩regrets呀?佢就話唔多講喇。
港交所董事會將會今日朝早舉行董事會議選新主席,如無意外金發局主席查史美倫會當選,被問到對下任主席嘅期望,周松崗就畀返頂高帽小加,話「長江後浪推前浪」,小加領導下會繼續向上。

李華華
mailto:[email protected]