當年今日
關於我們

愛國學生 - 左丁山

蘋果日報 2008/04/22 00:00


美國名校杜克大學(DukeUniversity)在三藩市奧運火炬傳遞之日,有兩派學生在校園靜坐對抗,一派美國及同情西藏學生與一派中國留學生罵戰,呢樣情況在美國大學校園發生,不足為奇,奇嘅係一位中國女生GraceWang自學生飯堂走出嚟,見到兩派都有朋友在,突然大膽到做和事佬,穿梭兩派之間,哀求佢哋對話,咁就死嘞,佢嘅照片當晚就出現在中國留學生網站,額頭畀人寫上「賣國賊」(Traitor),又有中國學生寫電郵畀佢,話如果佢回國,就會碎屍萬段(yourdeadcorpsewillbechoppedinto10,000pieces),然後佢嘅身份姓名,原居地(青島市)地址全部曝光。之後有一幅圖片上載,顯示GraceWang父母屋企門口畀人淋屎,父母匿埋唔敢見人。
Grace幾勇敢噃,對美國記者講:「賣國賊會傷害國家,我一定唔會傷害中國。愛國嘅意義係讓他人有發言權。」如此中國學生,實在罕有。佢聲言唔支持藏獨,只係希望大家有對話啫。一位愛寫古詩,彈古箏嘅女學生,點可能因言行入罪,遭碎屍萬段呀?杜克乃美國頭十名嘅名牌大學,課外運動以打籃球最巴閉,入得呢間學校嘅學生,IQ一定有番咁上下,何故中國留學生去到美國名校,學唔到人哋嘅希臘式辯論,而係一旦碰上敏感議題,就立即殺氣騰騰,一定要凡我漢族,必須敵愾同仇,站在同一陣線,同敵人死過,膽敢不從者就係漢奸叛徒賣國賊呢?三反五反、百花齊放運動以及文化革命幾十年前之餘毒,仍然藏在中國大陸學生腦袋內,可嘆也。
中國學生出洋多數讀理工科,靠數學好,通常成績唔錯;讀人文學科與社會學科者比較少,即使修讀,仍然思想上有好多禁區。一位留學生話過畀左丁山聽,佢哋上國際關係seminar時,遇到討論中日關係、台灣問題、中美對話等題目,班上中國學生一定同一口徑、同一態度,人人好似背誦台詞,全無討論餘地。教授試吓搵中國學生做異見分子,講相反說話,以刺激討論,中國學生一於唔制,於是每次都係外國生扮反對派,久而久之,大家在課堂上幾乎反面,朋友都冇得做。呢位留學生好懷疑中國同學回國之後,對國際有幾多認識噃!