藝人淫照風暴好似籠罩香港嘅冷空氣咁，相信仲會持續一段日子，幾個疑似淫相女主角日日見報，原來仲有一個人曝光率驟升，就係白鴿黨資訊科技界議員單仲偕，佢同八方講，呢單娛樂圈新聞唔單止兩岸三地人民八卦，連Bloomberg、TheWallStreetJournal等國際財經媒體都好關心，近日好多外國傳媒記者搵佢評論事件，當然唔係叫佢分析相片內容，係講香港規管互聯網嘅法例。

突破內地傳媒封殺

單仲偕話沒有調查就沒有發言權，所以佢都有睇過兩、三張淫照，佢強調唔知奇拿係邊個，相片係朋友畀佢嘅。國際傳媒搵佢評論好正常，最意外係內地新聞機構都搵佢，佢話同內地一個通訊社記者傾咗15分鐘電話。幾百張淫相竟然令佢突破內地傳媒封殺，世事真係無奇不有。
今年立法會選舉，單仲偕九成九會由IT界轉戰九龍西直選，佢唔敢偷懶，日前喺日本外遊返港後，就同涂謹申孖咇去深水埗派朱古力金幣。九西下屆多一個席位，各黨派都覬覦，白鴿黨要攞兩席好難，佢同涂謹申各自修行，各安天命。九東方面，李華明同胡志偉應該各有各做，肥仔明今日喺觀塘扮財神向市民拜年，積極鞏固票源。