當年今日
關於我們

【韓流】朴有天大談拍床戲感受

蘋果日報 2014/08/10 06:00


韓團JYJ成員朴有天最近處男下海,踩入電影界演出電影《海霧》。戲中佢同女主角韓藝璃有錫錫戲面之外,仲會有床戲添!

日前,朴有天同女主角韓藝璃接受電視節目訪問時,就講到佢哋拍床戲嘅感受喇。朴有天話:「同韓藝璃拍床戲之前,我同導演其實傾咗好耐,應議點樣去理解呢幕床戲。當開始拍嘅時候,我就慢慢理解我自己嘅角色,感受到要努力生存落去嘅感覺,當時諗咗好多嘢,亦都覺得好心痛,而喺銀幕上面再睇返個幕都覺得好sad。」

而韓藝璃就話:「嗰一刻紅梅(韓藝璃飾)唯一可以信嘅人就係東植(朴有天飾),其實應該係咩諗法都冇,只係好單純咁想感受大家都仲生存緊。大家睇完套戲之後,就會感受到其實場戲真係好sad,因為兩個主角都太可憐喇,拍嗰時都流咗好多眼淚。」

而JYJ近日亦都喺官方YouTube頻道上公開咗一條成員們互相採訪近况嘅短片。片中,金俊秀就問金在中,過去喺MV入面嘅kiss戲係唔係都親自上陣,金在中就講笑咁話:「係。」金俊秀信以為真,之後仲擺出一個好驚訝嘅樣。

之後,俊秀又再問朴有天有關喺《海霧》入面嘅床戲,朴有天聽到之後就話:「點解佢嘅問題唔係kiss就係床戲?」俊秀就好細聲咁話:「因為我孤獨先咁樣。」另外,JYJ喺今晚會喺首爾舉行第二場演唱會。