22歲澳洲新星祈普敦開鑼日處子登場，即獲得大摩力撐，第三場特首盃隻「飛來猛」，上星期六由祈普敦勝出嘉年華閘後，當事人連日都四萬咁口，狂話「飛來猛」狀態對辦，1200米憑新鮮感加上隻馬性格忠心，好有機會捧盃。

祈普敦同史卓豐都係「90後」，無論圈中人同馬迷肯定會將兩人比較，史卓豐爸爸史科菲在港騎過幾年，史卓豐早對香港馬圈有一定認識，反觀祈普敦真係由零開始，但他好快學識一招，就係出席馬房拜神儀式。

祈普敦話自己去咗3個馬房拜神，除咗大摩，仲有文家良、姚本輝，體驗華人傳統，最重要向練馬師同馬主自我介紹，祈普敦自爆喺姚廄拜完神，有位熱情馬主送咗袋生果給他，搞到佢有啲怕羞尷尬。

祈普敦同女友Morgan抵港差唔多1個月，他說空閒時間就四圍觀光，同遊客冇分別，最鍾意嘅拍拖活動竟然係一齊坐天星小輪，享受維港景色，一程船費每個人只$2.5，吹下海風經濟實惠，又夠晒浪漫。