皇都戲院丨陳果出身放映員重溫舊夢 張寶華遊故地取材寫愛情鬼片

蘋果日報 2020/12/05 00:30

MT_娛樂陳果皇都戲院張寶華北角飛拱浮雕強拍
    在北角屹立超過60年的北角皇都戲院，早前被新世界發展強拍，復修工程如箭在弦，日前《蘋果》和導演陳果及、童年在北角長大的張寶華重踏戲院舊址，勾起不少回憶。
    導演陳果對戲院情有一份執着的情迷，他的「97三部曲」第二部作品《去年煙花特別多》，電影中段講述何華超為首的華籍英兵，在北角皇都戲院天台商量打劫計劃，一班人在飛拱上行來行去，原來這份執着是來自陳果年輕時，曾在戲院任職影片放映員。在北角長大的前主播張寶華，憶述小時候和家人一齊到皇都戲院睇賀歲片，是童年一大樂事，二人早前在發展商新世界發展的公關安排下，重遊皇都戲院舊地。
    陳果講到1998年在皇都取景，是源於導演的本能，他說︰「要先知先覺，唔係後知後覺。拍《去年煙花特別多》時就覺得套戲欠一啲好signature嘅嘢，1998年當時皇都停院，驚佢拆，就想拍低啲影像保留，不過搵唔到金主。」當時構思是一大班人在大廈天台對談，影象跟意像都會好看，陳果補充︰「香港人好有好奇心，雖然你日日睇住，但到底入面係點，大家都好想知。」身邊的張寶華十分認同說︰「媽咪真係講過，小時候屋企喺皇都隔籬，試過有賊人由飛拱想行入屋打劫。導演套戲recall返我，原來飛拱咁高，呢個謎終於解開。」

    為拍戲乜都夠膽死

    陳果自爆年輕時做過放映員，電影還是菲林年代，一套戲院分成幾套菲林，靠「走片」幾間戲院共用一套菲林，他說︰「菲林貴，減少成本就近嘅戲院share一套菲林，用電單車送，戲院放映時間會有幾分鐘差別，用嚟走片。最衰細個做過一年放映，對放映室有一定迷戀，以前啲建築物冇咁求其，花崗石等等都好有質感。」陳果講返當年在皇都戲院拍戲，依然好興奮︰「聯絡唔到業主，地下又冇路行上天台，咪租咗最近皇都嘅一間屋，然後搭咗一條10零呎長嘅臨時木橋行過去。」聽到這裏張寶華讚嘆不已，她說︰「呢啲就係香港電影人或者香港人嗰種flexibility，同埋乜都夠膽死、乜都搞得掂。」

    陳果威逼利誘何華超行飛拱

    電影背後還有一段不為人知的故事，片中所見何華超等一班大賊，在皇都獨有的飛拱上來去自如，看似輕鬆，私底下陳果要用盡威逼利誘手段說服演員行上去，他笑說︰「嗰班人咁英明神武，嗰時逼佢哋上去，鬧到我死，話我『狂魔』定乜嘢，上邊拍係好睇啲，不過多少都有啲作狀嘅。鬧還鬧佢哋都做，叫你死就話啫，叫你生okay嘅。」套戲距今已22年，陳果對皇都戲院仍念念不忘，他最想拍一套有關戲院的鬼戲。

    張寶華望戲院復修保留古典元素

    張寶華近幾年開始寫小說、寫故仔，她說︰「對一啲好現實嘢，已經夠，所以想寫一啲超現實，唔使合情理本小說都係超現實嘅故仔。好多謝媽咪，細時乜都畀我哋試，學畫、學琴。睇戲有配套，就係同食西餐一齊做，漸漸變成一套culture。」張寶華出過兩本《死神教父》和《失眠書店》超現實小說，她認為鬼片是最好睇的港產片題材，希望藉今次機會可以同陳果取經寫電影劇本。
    新世界早前透過強拍統一業權，稍後重建時打算保育皇都戲院的相關部份，特別是天台的飛拱及外牆的《蟬迷董卓》浮雕。張寶華話是好事，至少可以保留一點對北角的回憶，她說︰「可以整得古典啲，有vintage舊feel，童年時覺得北角好靚，而家舊咗好多。自己上海人以前北角叫小上海時係好啲。」她不諱言作為上海人有一種優越感，生於上海家庭，家中仍用上海話溝通，張媽媽更加傳統，一直希望囝囝可以娶上海女仔、囡囡嫁上海人就美滿。目前北角已是福建幫天下，令她更加懷念過往「四五六」、「三六九」等上海菜館。講到印象最深，令她聯想到上海的電影，居然是王家衛的《一代宗師》，張震開的上海理髮店。
    皇都戲院前身為璇宮戲院，1957年底璇宮易手為陸海通家族收購，發展成住宅及商用建築物。解放初期北角吸引不少逃難到港的上海人居住，故當時有「小上海」之稱，區內開設不少上海菜館。皇都戲院於1997年上映完成龍主演的《一個好人》後結業，改營為桌球會，今年新世界集團透過強拍取得所有業權。皇都天頂的拱橋式支架設計、外牆浮雕等獨特建設，加上本身的歷史意義，終於在2017年由古物諮詢委員會確認皇都戲院為一級歷史建築。
    empty
    講起戲院逸事，陳果如數家珍。
    empty
    由璇宮戲院到皇都戲院，這幢建築物座落北角68年，外牆浮雕是建築特色之一。
    empty
    戲中演華籍英兵的黎志豪，要在飛拱行來行去。（影片截圖）
    empty
    飛拱最高處跟天台有超過2層樓高。（影片截圖）
    empty
    《去年煙花特別多》由上映到今日已事隔22年，飛拱仍保持完好。
    empty
    皇都內部建構仍停留70、80年代。
    empty
    天台的飛拱柱位仍保留得非常完整。
    empty
    天台面傾斜方便去水，陳果同張寶華每步都要小心翼翼。
    empty
    皇都戲院對落就是車水馬龍的英皇道。（影片截圖）
    empty
    水塔是《去》片其中一個取景地方。
    empty
    一班賊坐在天台的水塔位商量打刧大計。（影片截圖）
    empty
    皇都戲院前身是璇宮戲院，後來由陸海通家族收購。（資料圖片）
    empty
    皇都戲院前世今生，全名應該是皇都戲院大廈。
    empty
    戲院的放映室建於天台，已日久失修。
    empty
    戲院後期改裝成桌球室，二人背後的牆是原先大銀幕位置。
    empty
    戲院的樓梯位加建成高台，變成上層。
    empty
    室內依然見到不少戲院痕跡，樓梯位上去就是原先的超等座位。
    採訪：勞燕萍、何永寧
    攝影：沈健程
    攝錄：廖達燊、馮嘉銘
    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！