呢兩日本港其中一件大事，肯定係國際樂壇天后麥當娜（Madonna）來港舉行首個香港演唱會，Madonna紅足幾十年，儲落老中青幾代樂迷，入場睇佢表演嘅，都有大把名人，聽聞，「超人」李嘉誠位紅顏知己周凱旋都會去睇㖭呀。
唔講唔知，周凱旋早於2006年一次電台節目中透露過，佢好鍾意Madonna嘅《Open your heart》，呢首係Madonna喺1986年唱嘅快歌，係一首講愛情嘅作品，Madonna喺MTV入面嘅表演一貫性感。
周凱旋認為，Madonna係當時時代女性嘅模範，推動咗年輕人嘅思想與觀念改變，佢仲大讚對方將自我生活態度演繹得淋漓盡致。既然咁欣賞，難得對方來港開show，周凱旋肯定有飛在手喇。聽聞佢會去睇18號嗰場，會唔會忽然有事去唔到就唔知嘞。「賭后」何超瓊好似都有飛。小米嗰位靚仔嘅巴西籍副總裁Hugo Barra亦會專登來港睇Madonna。