今晚大台舉行台慶頒獎禮，佘詩曼憑《使徒行者》丁小嘉（釘姐）角色，揮低王菀之﹑黃翠如及徐子珊等，喺全民投票下，獲得75171票，膺最受歡迎電視女角色。

阿佘喺台上表示：「多謝大家鍾意我呢個角色，多謝監製，多謝設計咁好玩，咁多人鍾意角色，多謝劇中對手，多謝大家每一票。」

另外，阿佘今晚呢身打扮雖然幾靚，不過就被網民惡搞似戴咗頸箍，又鬧着玩話佢條頸有冇事。

至於最受歡迎電視男角色，許紹雄憑「歡喜哥」一角，喺全民投票62705票獲獎，歡喜哥表示：「多謝TVB﹑多謝投我一票朋友，成個歡喜哥角色都係監製構造出嚟，只不過我代佢做出嚟。」