做過九巴董事總經理同馬會主席嘅陳祖澤趁港大畢業禮，教精一眾師弟妹，畢業後點做一個精明打工仔。佢話老闆「重質不重量」，做好多嘢但效果差係冇用嘅，而誠信同承擔感都好重要，仲要同公司立場一致，保證大部份老闆會慷慨畀打工仔應有嘅回報。八方即刻諗起歌神許冠傑首名曲嘅歌詞「家陣惡搵食，邊有半斤八両咁理想，吹脹！」
港大噚日喺亞洲國際博覽館舉行學位頒授典禮，校友兼主禮嘉賓陳祖澤向在場7,183名博士、碩士同學士畢業生致辭，佢話出嚟做嘢，最注重係工作嘅質素，如果做得差，即使工作數量多都係冇意義，老闆最欣賞嘅係精明兼具生產力嘅員工。

唔可以「但求無過」

佢又話打工仔要肯為公司成就作出貢獻，將機構利益放喺個人利益之上，有長遠目光，絕唔可以有「但求無過」心態，如果有埋高度誠信，又肯不斷學習就可成為公司真正資產，得到老闆認同，有應得回報。
八方對呢番話有啲保留，佢打工嘅年代可能真係咁，家無良僱主當道喎，可以公開教班老闆點做好僱主就理想喇。