狼英「割地賣港」大計勢在必行，新界東北睇嚟難逃一劫，藝人杜汶澤前日喺facebook慨嘆「我們好有可能成為地球上最後一代的『香港人』」，過萬網友like爆話有同感，恐怕狼英統治下，捍衞民主自由嘅「最後一代香港人」好快消失。
阿澤有咁嘅諗法，係見到關於發展新界土地嘅示威，再加中港矛盾令港人負面情緒好高漲，經濟、政治同社會氣氛同以前唔一樣，「如果話香港靠大陸先有繁榮，咁回歸前咪一樣咁繁榮，自由行雖然令經濟上升，但唔係益到好多人，啲物價貴晒，乜都加，係人工唔加」。
阿澤以前諗過搵夠就移民，但家決定留低拍多啲喜劇，同港人一齊苦中作樂，「同內地對抗、排斥同互罵係愚蠢做法，香港應該做典範畀佢哋見識吓，你睇香港反國教，人群喺9秒9就可以讓路畀救護車，同內地反日示威分別好大」。

反映好多人擔心社會變化

香港中文大學政治及行政學系副教授馬嶽話杜汶澤嘅諗法得到廣泛共鳴，反映好多人擔心社會變化令到有啲嘢會惡化，至於係乜？可能每個人諗法都唔同。馬嶽認為香港嘅核心價值係自由，唔同嘅政見同言論都可以表達，唔擔心短期內會失去。
18歲嘅學民思潮發言人林朗彥覺得阿澤講緊香港人同內地人撈埋一齊，思想行為難以區分，家已有呢種趨勢，如果香港推行國民教育，未來港人就變成順民，同上一代唔同。佢話社會嘅希望唔喺政府度，而係喺人民身上，反國教令人民覺醒，佢對未來仍有希望。