馬天佑噚晚到長沙灣出席港韓合作嘅模特兒比賽，擔任壓軸嘉賓唱歌，佢話噚晚出席呢個活動好趕，因為啱啱幫林峯演唱會做fitting試衫。

林峯同黎明演唱會撞期喎，黎明間公司又幫你出碟，咁你會去邊個先？馬天佑就話兩邊都盡量抽時間去，加上嗰陣佢又要拍mv，唯有麻煩同事代勞安排時間表，但係林峯個演唱會晚晚都要去，因為馬天佑係stylist。

馬天佑又話兩個月之前已經幫林峯準備啲衫:「嗰陣都預咗佢會好fit，所以好狠心改衫，點知今晚再着上身，發現佢再瘦咗，見到真人真係好fit。頭先喺排舞室試身時，啲清潔姐姐都忍唔住偷望。既然改得咁辛苦，不如唔好俾佢着啦，佢就話呢個要賣關子。」

馬天佑同猷君嘅富家千金女友Kimmy份屬好友，同猷君又熟，對於噚日突傳兩人分手，馬天佑就話:「暫時未有時間見到佢，咩新聞都未睇，所以真係唔知。」睇樣都知，馬天佑係朋友堆中，最好嘅聆聽者，個個都搵佢傾訴:「可能因為我自己比較中肯，唔會因為同一個人特別熟就講說話偏幫佢。」咁你噚晚會唔會約Kimmy出嚟飲下嘢問佢呀？佢就話自己唔飲酒，只係飲橙汁:「不過唔急嘅，因為佢每次嚟香港都會見面。」