問：「Son姐，想請教吓你，我去in（面試）紀律部隊，如果你係考官，你想聽到啲乜？我點樣先可以令你有深印象？有咩技巧tips可以教我兩招？因為我煩惱緊個自我介紹...」

答：「作為紀律部隊，最着重嘅係乜嘢？係誠信！問你問題你仲要左諗右諗點樣去取悅個考官，你覺得你會有機會？班考官日日見幾多人，你以為你會瞞得過佢哋法眼？我之前都同你講過，去到最緊要關頭你竟然又唔記得？你做足準備已最好嘅狀態最誠懇嘅態度，表現出最好嘅自己就夠！一講技巧就流於表面，一令到人哋覺得你虛偽，你就玩完！

自我介紹其實係講故事，講一個關於你自己嘅故事。所以當中冇對錯，人哋亦都唔知道你個故事究竟係點樣嘅一個故事。你點解鍥而不捨，點樣鼓起勇氣再接再厲，有勇氣有決心，就啱啦！抱住黃沙百戰穿金甲，不破樓蘭終不還嘅決心，就對啦！記住，只有真誠才可以打動人心！唔好諗咁多，集中精神，唔好用個腦，用個心去答所有問題！」

問：「Son姐，唔好用個腦.... 你認真？」

答：「我嘅意思係唔好用腦左諗右諗猜度對方個問題想你點樣答，而係用心聆聽之後講最真實嘅感受答案。唔好用個腦嘅意思唔係叫你亂咁嚟冇腦啊傻仔！」

問：「但係我之前面試緊張到自己唔知講乜嘢，好驚今次又係咁！」

答：「放鬆啲，幽默啲，做乜搞到精神緊張？你講到自己之前表現咁差，你又過到關？咁就更加證明我冇點你，真誠最重要！如果你做戲比罐頭答案一早俾人踢咗出嚟！見到你緊張成咁就知道你有幾在乎呢個機會，所以你都過到關囉。既然去到最後一步Final in，死就死啦仲有乜好驚？記住，怕，就輸一世！」

張慧敏
-------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-------------------------
全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef