過山車拋高掟落式玩法，於股齡較深的散戶而言可謂司空見慣，但一個尋常散戶未曾遇過劇烈震倉，哪管你平時形象無論幾「大佬」都好，只要被綁在過山車上，副機器又開到「行」，亦可能承受唔住嚇到尊嚴難保！「驚」其實好正常，唔使覺得羞家。
受本港銀行忽然減息兼隔晚美股爆升推波助瀾，港股創出歷史新高19191後，下半場居然玩倒褪（股友們，「褪」音「吞」呀！），收市僅升2點，報18939，然而上下波幅達300點。「好驚」的散戶芭蕉問星俠「驚唔驚」？我答「唔驚」；點解？我的確「唔驚」，所以就「唔驚」，我反問芭蕉：「你似乎好驚喎？乜你揸住好多貨咩？」芭蕉卻即時默然不語。條友仔其實無乜股票在手，但又要學人「驚」！真係……。

折讓大惹憧憬

前陣子光大控股（165）曾單日勁升逾1元，濰柴（2338）獲大行推薦「買入」，股價都升到冇譜，這種升勢連國壽（2628）都未曾有！所以星俠正期待最多人炒的國壽幾時會狂升如儀？
鋼鐵價格今年9月回升以來，鋼鐵股走勢漸見光明。獲母公司注入資產的鞍鋼（347）因業績亮麗，股價升破9元；另馬鋼（323）亦見起步炒上，反襯出NAV折讓40%的重慶鋼鐵（1053）大升可期。
市場焦點並不期待重鋼業績，而是母公司有機會將重鋼售予北京中信集團，昨日重鋼出現大成交異動，可以追入，博短線爆上2元。
方星俠