當年今日
關於我們

【咦咦咦…】呂麗君去咗邊?甘比再陪大劉去福臨門

蘋果日報 2013/12/28 06:00

大劉甘比福臨門呂麗君劉鳴煒秀融三倍

日日都去同一間酒樓唔悶咩?悶唔悶就唔知,不過劉生就應該唔怕悶喇,劉生呢排成日同女友甘比仲有囝囝JosephJunior出現,冬至下晝做節啦、BoxingDay又一齊嚟,仲加埋大囡劉秀融。今日中午就原班人馬加埋劉老太、胞妹劉玉珍仲有甘比媽咪同囡囡秀樺一齊食飯,三次都係甘比,三次都係冇呂麗君份喎。

往時劉生都會陪吓呢個女朋友之後又陪另一位,但係呢排好似好耐都冇見過佢同女友呂麗君出現喇,對上一次兩人公開現身已經係10月中,場地就梗係永恆不變嘅福臨門啦。本月中,呂麗君去灣仔演藝學院籌款晚宴,大劉亦未有現身。

過往頻傳兩女爭寵,又話追仔希望可以「鞏固」地位,但「精乖伶俐」嘅甘比憑其過人口材同心思,成功「入屋」,同大劉與前妻寶詠琴所生女兒秀融都有偈傾,至於劉鳴煒都同甘比關係好好,今年9月,劉鳴煒更以華置副主席身份,與甘比及秀融同賀劉嘉玲新餐廳開張,三人有說有笑碰杯合照,反而呂麗君卻冇影,睇嚟關係比較疏離。

依家大劉同呂麗君咁耐都冇一齊出現,難免令人疑惑是否「局勢有變」,但係呢,本月初,大劉涉賄案於澳門續審,呂麗君亦有代大劉去聽審。咁即係……冇變?定係點?