四年一度嘅球壇盛事世界盃，本港時間昨凌晨大約1點喺俄羅斯圓滿落幕，賽前被視為大熱嘅法國隊擊敗黑馬克羅地亞隊勇奪冠軍。大批球迷前晚11點喺港島區酒吧全神貫注睇住呢場決賽直播，當法國隊奠定勝局捧走大力神盃之後，唔少支持者情緒高漲，湧出酒吧對開嘅馬路歡呼慶祝，喺中環雲咸街就有超過100個法國擁躉喺街頭開P。

忘形揮國旗截停的士

讀者羅先生噚日凌晨1點幾影低球迷狂歡嘅經過，見到大班球迷聚集喺雲咸街近荷李活道街頭興奮到又唱又跳，唔少人仲揮舞法國國旗。其間至少有兩部警車到場，阿Sir同Madam只係混入人群維持秩序，而球迷亦都十分識做，興奮一輪之後和平散去，冇不愉快事件發生。
同一時間喺灣仔嗰邊，讀者梁先生睇完波散場，同樣見到有20、30個球迷走出酒吧街駱克道馬路拍手高唱法國國歌，有人忘形到一邊揮動法國國旗，一邊截停駛過嘅的士，似乎想將呢份興奮嘅心情感染埋的士大哥，好彩冇造成混亂，眾人10幾分鐘之後行番上行人路，其間行孖咇嘅阿Sir都有喺度觀察住㗎。