上周終於打開〈開倉版〉勝門，貼中咗洛辛堡[-1]「主勝」，點知戰友蘋果波神拋低一句：「淨係貼埋啲擦鞋仔波，中咗都唔夠輸，畀啲『吉士』，貼冷門喇！」唔係唔想貼冷門，不過，心水嘅嘢真係好難講，好似今期咁，我又係鍾意擂台躉球隊，就係認為日乙榜首隊大阪櫻花迎水戶蜀葵可以勝出，仲捧埋有分頭嘅櫻花[-1]「主勝」。

櫻花火力猛已入71球

喺07年暑假我去大阪走咗轉，嗰陣大阪櫻花啱啱降落日乙，加上去到8月中都係表現麻麻，所以喺市內完全感覺唔到佢哋嘅存在，直至喺Outlet見到佢哋啲特價波衫，個腦先閃出佢哋嘅象徵人物森島寬晃。今時唔同往日，雖然佢哋仲喺日乙，但喺司令塔香川真司，同埋兩大射手乾貴士及卡奧菲臘比帶領之下；34場聯賽居然入咗71球，仲長居榜首，下屆好有機會返日聯。
大阪櫻花今仗嘅對手水戶蜀葵都唔差，其中喺前線孭重飛嘅高崎寬之今屆入咗13球，但佢拍檔荒田智之長唞完復出後跌晒watt，而且論實力始終唔及大阪櫻花，所以大阪櫻花W絕對係我嘅心水選擇。另外，睇番主隊今屆12場主場聯賽勝仗，有8場係淨贏兩球或以上，要埋[-1]「主勝」，贏3:1都啱心水。
歐洲波方面，我嘅挪超愛隊莫迪雖然喺上場聯賽爆冷輸畀維京，搞到13場以嚟初嘗敗績，不過咁反而好，令佢哋星期六迎戰阿里辛特時會打醒精神，一於直取[-1]嘅莫迪「主勝」同埋勝4:1呢個波膽。
至於美職聯美國芝華士上場擊敗紐約紅牛後，取得10場以嚟嘅首場勝仗，不過，實情係因為紅牛太差，今場芝華士迎戰FC多倫多時，傷兵名單仲係水蛇春咁長，加上多倫多又有中場迪羅沙里奧腳風順，FC多倫多[+1]「客勝」博得過。
上屆盟主
吾中

近5場往績：WL///