當年今日
關於我們

【愛回家結局】莫拉達傳重返意甲 AC米蘭重金買人

蘋果日報 2017/05/26 03:00

意甲西甲皇家馬德里AC米蘭艾華路莫拉達

皇家馬德里6月3號就踢歐聯決賽,同祖雲達斯力爭冠軍,不過加埋已經贏咗西甲,都似乎留唔住前鋒艾華路莫拉達,意大利傳媒報導,莫拉達已經答應AC米蘭開出嘅個人條款,希望下季再戰意甲。
莫拉達本身係皇馬青訓產品,前季喺意甲冠軍祖雲達斯表現唔錯,皇馬啟動回購條款買番佢,不過呢位24歲前鋒今季重返皇馬,始終爭唔贏正前鋒正選位置,所以又希望走人。據米蘭體育報報導,AC主席李勇鴻入主球隊後,希望大展拳腳,莫拉達就係球隊未來重心,所以提出達6千萬歐元(約5.2億港元)轉會費,750萬歐元(約6500萬港元)年薪合約,利誘莫拉達回流意甲,莫拉達本身都同意。不過據報皇馬教練施丹就好欣賞莫拉達,話會搵佢再傾,睇吓佢說唔說服到佢留隊。