百富環球（327）嘅電子支付銷售點終端瓣數，食正全球大趨勢，明年得7倍預測PE，比內地行家平咗80%。嚟緊深港通傳擴容，若果百富環球納入其中，以呢個PE水位，北水仲唔爆炒？
先睇數據。去到上年第三季尾，內地共發行52.5億張銀行卡，係全球銀行卡產業最快最多國家。又據「The Nilson Report」上年5月發報告，2014年，電子支付銷售點終端項目，喺包括埋中東非洲、拉丁美洲等新興市場，佔咗全球出貨量75%，需求勁大！

受惠港股通擴容

睇到亦諗到，科技改變消費付款模式，由以前現兜兜科水，到家陣刷卡、碌卡 ，而新興市場發展，啱先嚟料，百富環球呢一瓣，係有排玩！再講，百富環球係全球第三大出貨量終端商，兼已經佈局全球，講競爭優勢，彈出！
百富環球上年EPS 0.56元，增長54%，家陣得11.8倍PE。唔好計多，集團今、明兩年EPS，只係keep番上年增長一半水位，到27%，到0.71元同0.9元，現價6.65元明年預測7.4倍PE。內地近磅行家證通電子（深：002197），家陣98倍PE。
又新國都（深：300130）明年預測44倍PE，焦點科技（深：002315）33倍PE，百富環球平霸！
又深港通就快開波，已經有券商估計，嚟緊探討港股通擴容，恒指綜合小型股指數股份，有機獲納入，若擴容成事，以百富環球呢個質地，吸引到爆！當集團現價翻半番到近10蚊計，明年預測PE先得10倍，未有耐追到內地行家！

錢雋
細價股專家
本欄逢周一、三、五刊出